› 選擇地區
三藩市
紐約
洛杉磯
其他美國地區
香港 台灣 北美
 
2018年06月29日

隔牆有耳:按習主席要求 習主席關懷
娥特勁跳忠字舞 - 李八方

《蘋果》搵港大做民調了解市民點睇特首林鄭月娥上場一年政績,結果四成人覺得佢最成功係取信中央,咁林鄭擦中央鞋係有一手,好似佢接受咗《紫荊》雜誌嘅專訪,入面左一句按習主席要求、右一句喺習主席關懷下,真係唔只緊跟習主席,直頭係做主席嘅好學生。

話上任一年難忘習講話

今期《紫荊》要慶祝兩個一周年,第一個係國家主席習近平視察香港一周年,另一個就係林鄭上任一周年,咁林鄭嘅訪問都習主席乜乜乜啦!林鄭喺專訪形容,呢一年嚟感受最深就係「中央對香港的全力支持,包括習主席視察期間的重要講話」,果然政治正確,仲話佢作為特首有堅定信念去「按着主席的要求,全面準備貫徹落實一國兩制」,跟住跟足習講話大講必須尊重一個國家、自覺維護國家主權等等,當講到呢一年香港發咗一啲有爭議嘅事,林鄭立即上身話特區政府對任何鼓吹港獨言論,「立場都是堅定的,是堅決反對的」!
呢個忠係未表完嘅,仲有林鄭話喺習主席關懷下,內地出咗便利港人措施,以及習主席親自關懷香港創科發展令佢感受最深,最後佢話過去一年港府按住習主席要求展現團隊精神,未來會「志不求易、事不避難」咁推動香港發展,真係全個訪問落足鞋油!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載