› 選擇地區
三藩市
紐約
洛杉磯
其他美國地區
香港 台灣 北美
 
2018年06月29日

爆相爆片:手掌咁大隻蛾驚艷現身

伏喺天橋石柱嘅大皇蛾差唔多有成隻手咁大。

成隻手掌咁大隻嘅飛蛾,前日喺石屎森林出現,巿民嘆為觀止。譚先生星期三朝早喺馬鞍山新港城行去三期嘅行人天橋上面,俾一隻花紋凸出嘅飛蛾吸引,當時隻飛蛾伏喺行人天橋旁邊嘅石柱,兩翼啡色同白色對稱嘅花紋好靚,佢都忍唔住要停低影相。
翻查資料,原來前年7月一隻同品種、闊成一呎嘅飛蛾,喺粉嶺和合石出現嘅時候,一樣引嚟巿民嘩嘩聲,除咗佢又大隻又靚又罕見之餘,喺拜山嘅地方出現難免惹人聯想係唔係先人嘅化身!𠵱隻飛蛾叫做大皇蛾,係飛蛾之中嘅巨無霸,幼蟲階段嘅體形已經出眾,一對翅膀最長可達12厘米。
大皇蛾由幼蟲至結繭嘅成蛾之路會經歷五次脫皮,歷時60幾日。不過,成蟲後嘅大皇蛾因為口部器官會脫落,餘生都冇嘢食落肚,只可以靠體內剩低嘅脂肪維持一至兩星期嘅壽命。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載