› 選擇地區
三藩市
紐約
洛杉磯
其他美國地區
香港 台灣 北美
 
2018年06月18日

隔牆有耳:
譚志源難忘跟老竇鋸扒 - 李八方

譚志源接受港台訪問,分享同亡父嘅點滴時感慨萬千。

唔一定要喺父親節先攬攬爹哋,平時都要對老竇好啲嘅。政制及內地事務局前局長、港區人大代表譚志源接受港台節目《舊日的足迹》訪問,分享同亡父嘅點滴時感慨萬千,佢話每次考第一,老竇都會拖住佢去西餐廳鋸扒,仲會好proud咁向侍應晒命;當年考入港大,老竇就回鄉設宴款待鄉親,到咗做官更加大事慶祝。

自覺官職越高越離地

譚志源仕途唔如意之時,爹哋舊病復發,佢話當時每日要去醫院探病,有一日因為做得好晏諗住翌日先去,點知從此永別,爹哋半夜走咗,佢直言呢個係佢人生最大遺憾,亦令佢學識要平衡工作、家庭等方面嘅重要性。
佢喺訪問中都有談及去年離開政府嘅原因,包括唔想退休之前都未做過其他工作,同時感覺到職位越高、自己越離地,兼且立法會「拉布」好嘥時間,認為做其他工作更能直接貢獻社會喎。
本來任職新風醫療副主席及新風教育主席嘅佢,上任未夠一年就走人,30號離任,但會轉任集團高級顧問。至於新動向,譚志源仲未透露,據知佢8月就會返新工,新公司唔係政府機構或上巿公司喎。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載