› 選擇地區
三藩市
紐約
洛杉磯
其他美國地區
香港 台灣 北美
 
2018年06月13日

隔牆有耳:厲害了「愛國不分紅底唔紅底」
689︰香港需要更多屈穎妍 - 李八方

建制派知名KOL屈穎妍噚日開記者招待會宣傳新書,就連全國政協副主席、前特首梁振英都畀面撐場,唔少得嘅當然係一樣好「紅」嘅周融同前新聞統籌專員馮煒光,大家仲發言支持一番㖭。見到場面咁「盛大」,八方都好想為大家報道一下「盛況」,不過主辦單位之一嘅「HKG報」向《蘋果》下禁令,有個職員直頭話:「你哋有權採訪,但我哋都有權唔畀你入。」
查實呢,除咗娛樂性,相信冇乜重要性,八方同事轉身走人,橫掂唔少「紅底」網媒都有直播,仲要任睇唔嬲。據直播畫面所見,689當正自己有書發佈,發言時間仲長過屈小姐,佢話自己將來出書,書名會叫《我係英皇仔又如何?》,話自己即使係殖民地官校出身,都支持中國收回香港,因為「愛國不分古今、不分中外,係自然而然嘅」。佢又話,無論紅底唔紅底,香港需要更多屈穎妍喎,大讚對方敢言直說。

暗斥老董推八萬五欠決心

其間689仲重提前特首董建華放棄「八萬五」,係因為特區政府受到社會輿論壓力,同立法會「反對派」議員反對,不能推動,深信當年政府若能堅持,實現計劃,「香港如今唔存在房屋問題」。有記者喺答問環節問佢係唔係鬧老董?佢冇正面回應,只稱如果有立法會支持,就唔存在房屋問題。
至於屈小姐,佢話自己係左校出身,為咗鼓勵同為愛國學校出身嘅師弟妹,所以出版呢本名為《既是紅底又如何?》嘅書,希望支持中國嘅人,可以理直氣壯。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載