› 選擇地區
三藩市
紐約
洛杉磯
其他美國地區
香港 台灣 北美
 
2018年06月06日

財經人物:從精工班主到鐵路大王 香港敗走曼谷翻身
黃創山︰打到加時都同你死過

今日成為曼谷鐵路大王,黃創山(左)自言︰「留喺香港,我冇今日。」林志謙攝

【本報訊】「我信命運!」黃創山說。「當年,一係跳樓,一係面對,即係冇得揀。」八、九十年代泰國首富之子,曾是香港傳奇足球隊精工的班主,97金融風暴,將他由山頂扯落地底。
球場上永不言敗,最終卻以一蚊賣走上市公司,從香港敗走。看似狼狽,其實是斷臂求生,黃創山選擇返回曼谷修鐵路。這條架空電車BTS,後來成為曼谷市中心的交通命脈,也再次扭轉黃創山的命運。今日,坐擁四家曼谷上市公司,掌控千億基建、地產及媒體王國,黃創山「衣錦還鄉」,獲特首林鄭拜訪,與糖王郭鶴年聯手搵食。黃創山難忘當年風水師傅一句話:「喺最壞嘅時候,佢同我講:你一定唔會係咁,我睇到你會企返喺座山上面。」
特約記者:黃菲菲

訪問在曼谷進行,午後,黃創山帶同兒子黃瑞耀一家,坐私人飛機回香港,慶祝母親節。「返香港搵老婆。」黃創山妻子與女兒仍住在飛鵝山明華園大宅,他和兒子不時回港探望。
「我13歲去香港,98年走,前後35年,仲耐過我喺曼谷嘅時間。」曼谷出生,被泰國商界人稱為「中國龍」的黃創山,仍視香港為家鄉。當年因搞足球而結緣的朋友,包括南華會主席盧潤森、足總前主席余錦基等,仍是他的飯腳。另外,霍震寰、霍震霆兄弟,鷹君的羅嘉瑞、羅康瑞,均屬世交。但講起再投資香港,黃創山即耍手擰頭:「香港樓好貴,基建冇空位,泰國機會大好多。」

相關新聞:一個前鋒一個守門 父子日日嗌交

複製港鐵 為BTS起死回生

曼谷市區,BTS附近,正在建造中泰鐵路,是中國「一帶一路」的重點項目。扎根香港的嘉里集團,也看中當地商機。四月底,嘉里物流(636)宣佈,引入BTS的附屬公司為戰略夥伴,聯手進攻泰國物流業。「𠵱家香港、中國嘅公司都來搵我哋合作。」黃創山說。
「如果98年揀咗留喺香港,我就冇今日。」當年黃創山並非做逃兵,而是返曼谷撲火。金融風暴,泰銖崩盤,以美金舉債的BTS,負債「一蚊變三蚊」,暴增至過千億泰銖(當時折算約200億港元),但他堅信只要BTS通車,就有翻身機會,「BTS位處曼谷心臟位置,就等同香港嘅MTR。」黃創山一開始已打算將港鐵模式,照辦煮碗搬到曼谷。「92年投標,我哋最專業,因為我喺香港MTR請咗班人來幫手。另外兩間本地公司,一間就咁拎架巴士喺架空路軌上面行,另一間抄巴西系統,用泵嘅,即喺遊樂場用嗰種。」

學足全套 沿線圈地起樓

98年BTS重組,獲得香港新世界集團及韓國三星集團等白武士的支持,終於99年成功通車,黃創山邊做邊還債,「銀行嘅錢基本上還晒,喺利息打咗折。」
BTS起死回生,同於90年代,由香港合和實業投資的鐵路,卻「爛尾」收場,現於曼谷仍能看到一座座廢棄的橋墩。黃創山解釋:「大家投資嘅路線唔同, BTS喺曼谷市中心嘅中心,胡生(胡應湘)嗰條喺曼谷市嘅邊皮,接駁曼谷機場,運人出市郊。」
BTS獨佔地利,成為生金蛋的鵝。黃創山「學嘢學全套」,仿效港鐵發展地產,早年已密密以低價買地。「有路軌去到嘅地方,地產就會升值。我哋預先知道個站喺邊,就可以快人一步買入周邊嘅地皮。」黃創山指公司的土地儲備達24億平方米,市值約100億港元。
兩年前,BTS開始與泰國三大發展商之一的Sansiri合作,在BTS沿線起樓,當中不少買家是香港人,部份樓盤的港人買家比例近兩成。「我哋有地,佢哋有經驗,𠵱家已經做咗十一、二個盤。」黃創山表示,曼谷塞車問題嚴重,BTS成為樓盤的最大賣點。
2015年,黃創山收購曼谷上市的地產公司U City,注入地產業務。去年6月,進軍東歐,於歐羅低位時,狂掃酒店。「𠵱家有39間酒店,業權連同管理,分佈喺柏林、捷克等地。我睇好東歐發展,嗰邊物價便宜,會係好受歡迎嘅旅遊點。」
以鐵路帶動地產,最大的投資仍在基建上。去年,黃創山再投得兩條鐵路,投資額約1,000億泰銖(250億港元)。最近,又準備投標另一投資額達2,000億泰銖的高速鐵路。再斥巨資修鐵路,令人聯想起BTS差點沒頂的教訓,黃創山形容:「絕對喺痛苦嘅經驗,唔好再經歷一次啦。」
「亞洲金融風暴前,泰銖嘅匯率好穩定,一蚊泰銖兌三、四蚊港幣,維持咗廿幾年,大家都冇經驗。」20年過去,當年的慘況仍歷歷在目。「呢度幾乎間間公司都出事,好多人拎晒屋企啲金呀錶呀,就咁擺喺車尾箱賣,畀香港人來買。」黃創山妻子也曾拿出私己珠寶,欲助丈夫還債,「好彩冇賣到,呵呵。」銘記在心的,除了妻子的恩義,還有外匯的凶險。黃創山直言,現時泰國項目報價均以泰銖,「因為我哋收入係泰銖,如果要用外幣,就一定做足對沖。」
最艱難的時刻,黃創山沒有想過破產,也沒有開口向父親兄弟求救。黃創山父親黃子明叱咤泰國、香港商界,曾是泰國首富。「幫唔到,等同倒錢落海。」認識黃創山的人,都知道他打仔性格,搞精工時,每場波都去到盡,「打到加時都同你死過!」不服輸,為他帶來最後的勝利。
「就快70(歲),望返轉頭,我係好勝,當年搞足球,相信會贏先去搞。」如今連球賽都沒看的黃創山,回想精工歲月,仍十分牙擦:「老一輩嘅體育記者都記得,我講得出就一定會出現!我亦係第一個用衞星直播意大利聯賽畀香港人睇,嗰年意大利拎咗世界盃冠軍,好hot,冇人預計我可以做到。」就如97一役,黃創山形容是「奇蹟」,還應驗了風水師當年的批語,不但爬起身,而且站得更高。

https://hk.news.appledaily.com/wonder/realtime/article/20180606/58275437

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載