› 選擇地區
三藩市
紐約
洛杉磯
其他美國地區
香港 台灣 北美
 
2018年06月04日

隔牆有耳︰
建制爭出線戰九西 
經民聯新仔 獲陳帆點燈 - 李八方

劉小麗撤銷宣誓案上訴,意味九龍西稍後又要補選!八方早前已經預告過,建制內有人游說食衞局前局長高永文披甲戰九西,希望以「中間派」角色搶灘,高醫生噚日出席活動時,首度證實獲邀上陣,但原來佢未斷言say no,目前仍在考慮中;與此同時,眼見上次民建聯由鄭泳舜隆重登場,另一愛國政團經民聯肯定酸溜溜,近期力谷深水埗區議員梁文廣,希望由黨內新星上陣,噚日仲獲運房局局長陳帆落區助拳,唔知最後尾邊個跑出呢?

民望高獲邀上陣 稱未有決定

其實經民聯一班大佬早前已經不停同梁文廣現身,提早為佢造勢,噚日又有另一場抬轎大龍鳳,邀請咗陳帆一齊落區視察石硤尾邨兼飲茶。點解係石硤尾邨?除咗嗰度樓齡近40年單位殘缺破舊,相信都係因為嗰度係九龍西選區,梁文廣可以傍住出巡向局長反映「重建屋邨,原區安置」意見,仲唔係提早「成功爭取」?
而佢要成功出線,民望高意向可能係關鍵,事關民望高噚日承認有人一直游說佢參加九西補選,坦言現階段仲未有正式決定,現時交代係咪參選亦太早,指自己離開政府後都有其他醫療相關工作,所以要再睇睇時間分配先去做決定。
咁會唔會支持梁文廣出選?民望高話喎,暫時唔會評論任何一個可能嘅候選人,覺得最重要係佢要有能力、有魄力,而且真心為香港巿民工作。唔知喺西環心目中,民望高同梁文廣,邊個有能力啲呢?

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載