› 選擇地區
三藩市
紐約
洛杉磯
其他美國地區
香港 台灣 北美
 
2018年06月04日

爆相爆片:
入村遇惡狗 阿Sir掉頭走

「內有惡犬」就成日見,但東涌散頭村就啱啱掉轉係「外有惡犬」。事源一個村民養咗5、6隻大型狗,但冇管教放任狗隻周圍走,結果唔少同村居民或行山客都被咬傷。村長話過去一年因被狗咬而報案嘅個案最少4宗,令村民出入擔驚受怕,連阿Sir見到都嚇到掉頭走。

村民多次報警無果

住喺惡狗狗主隔籬嘅鄭先生講,惡狗由一對夫妻飼養,他們放養啲狗喺村內見人就咬,自己亦曾被咬傷。佢話曾多次報警,警方轉介漁護署後,話私人地方無權入。鄭生呻求助無門,出入拎住支棍自保,「只係想佢困好啲狗」。
惡狗有幾惡?就係阿Sir見到都嚇到掉頭走,話說兩位警員同兩位消防員上周五去查一單縱火案,但未到案發現場已被惡狗「招呼」。最少4隻狗衝向阿Sir,來勢洶洶,嚇到阿Sir走夾唔唞。最終有村民持棍嚇退惡狗,阿Sir先至查到案。
據了解,狗主夫婦無業,兩人大約3、4年前搬返村內住,初時只養一、兩隻狗,後來有狗生咗狗仔,又收養其他狗,最高𥧌時養達14隻,目前仍然養緊5、6隻狗,包括唐狗及洛威拿等。村長鄭先生指試過有行人誤闖被惡狗咬傷。鄭村長話兩次約見狗主到村公所傾,對方見面時承諾看管,但轉頭就冇咗件事。佢話,曾向警署同漁護署長反映,但對方都表現得愛莫能助,「(有關部門)卸責,有CCTV都話認唔到邊隻狗咬人!」鄭村長呻只能寄望政府執法。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載