› 選擇地區
三藩市
紐約
洛杉磯
其他美國地區
香港 台灣 北美
 
2018年05月29日

爆相爆片:街頭力抗五警 壽司賊成口血

銅鑼灣一間超市喺星期六俾人偷嘢,有個中年男人偷咗幾盒壽司準備慢慢嘆,點知原來阿Sir老早贒到佢,等到小偷行出超市門口,便衣警員就人贓並獲,當場將佢㩒低拘捕。不過對方激烈反抗,搞到頭同口都撞到流晒血,有圍觀途人仲以為疑犯咬脷自殺,最後男子俾阿Sir鎖上手銬,送院治理。
間超市位於記利佐治街,人流都好旺,咁啱阿Sir喺附近一帶進行反盜竊巡邏,小偷當場斷正啦。事發喺星期六傍晚,讀者陳先生見到一個中年男子攞住幾盒壽司走出超市,突然有兩位便衣阿Sir衝出嚟將佢拘捕。
個男人當時爆晒粗唔肯就範,極力掙扎,其後兩、三個阿Sir增援,四、五個阿Sir終於合力將個男人制服喺地上,嗰幾盒壽司就跌到通地都係。警方證實拉咗個32歲姓余男子,佢涉嫌店舖盜竊,喺超市偷咗300蚊食物。警方又承認疑犯一度情緒激動,頭同口受傷,事後送去律敦治醫院治理。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載