› 選擇地區
三藩市
紐約
洛杉磯
其他美國地區
香港 台灣 北美
 
2018年05月29日

爆相爆片:埋伏三晚擒掟煙狂徒 
探員險中「頭獎」

東涌映灣園近月出現擲物狂,狂徒上月10日內6次高空擲下冒火煙頭,令住喺低層連平台單位嘅董叔叔擔驚受怕,日夜擔心釀成火災,於是多次報警求助。點知狂徒未識驚仲變本加厲,更在今個月7日內8次「空襲」冒火煙頭。警方於是喺上周連續三晚埋伏,終於喺上周五深夜拘捕一名法國籍男子協助調查。

相關新聞:爆相爆片:住戶:阿Sir金睛火眼做到嘢

29歲法漢被捕

映灣園6座低層住客董叔叔曾多次報警求助,但都被警方指冇閉路電視片段難以跟進,而管理處亦被指懶理未有重視。佢於是自行安裝天眼全天候監察,終於影到天降冒火煙頭片段,發現案發時間都介乎深夜11點至凌晨1點,而且幾乎由同一單位跌下。
董叔叔親自到警署向指揮官求助,警方終介入調查。警方發言人曾指,調查後發現董叔叔同層另一單位的室外部份,亦有雜物懷疑從高處墮下,案件列作高空墮物,交由大嶼山警區刑事調查隊第三隊跟進。
警方指案情嚴重,因為未熄煙蒂恐怕會引致火警,於上個星期三(23日)開始,連續三晚派出警員到受影響低層單位埋伏監察。消息指,上星期五晚近11時,警方終於發現有人從高層單位擲下冒火煙頭,當時煙頭幾乎擲中兩名坐喺平台花園在場監察嘅警員。
警員隨即記錄低時間過程,又到21樓懷疑涉案嘅單位,經調查後以涉嫌高空擲物拘捕單位內29歲法國籍男子,帶署協助調查,佢其後獲准保釋外出,6月底須向警方報到。據了解,法國仔任職會計公司。
呢場困擾董叔叔多時嘅風波終告一段落,董叔叔指上星期五警方拉人後,到目前都未再有冒火煙頭從天而降,終於可以安心瞓覺。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載