› 選擇地區
三藩市
紐約
洛杉磯
其他美國地區
香港 台灣 北美
 
2018年05月28日

隔牆有耳:
逢黃雨被網民召喚 
馬仔向台長呻:畀我唞吓 - 李八方

台長岑智明(左)搵馬仔拍片解釋黃雨都會水浸,睇嚟馬仔都冇得唞啦。

近年天氣反常,除咗炎熱天氣屢破紀錄外,下雨天嘅雨量亦十分驚人。唔知大家有冇留意到,每逢黃雨或水浸,藝人馬浚偉都會出動,一如打風,就會見到誠哥,儼如「吉祥物」!天文台台長岑智明都有留意到馬浚偉現象,近日原來邀請馬浚偉同場拍片解畫,並以碟頭飯「加色」為例子,解釋天文台發出警號訊息時,係根據多項數據得出,強調就算係黃雨,可能都會出現水浸。

台長:黃雨都會水浸

馬浚偉點解會關事?咁又要講吓歷史。2014年無綫劇集《守業者》大結局播出當日,香港暴雨成災,多個地區出現水浸,咁啱當日有水浸情節,馬仔喺電視機畫面不停游,而黃雨圖示就出現喺畫面左上角,天文台其後改發紅色同黑色暴雨警告,而網民就將呢個畫面截圖,諷刺暴雨下天文台經常只係發黃雨警告。
而台長岑智明搵嚟馬仔拍片,梗係要為天文台申冤。片中嘅馬浚偉喺茶餐廳遇到岑智明後,隨即上前訴苦,話自己每逢遇到黃雨就被網民「召喚」,「游水咁多年都會攰,你哋畀我唞吓得唔得?」岑智明其後就以「碟頭飯」加色作例子,解釋暴雨警告屬全港性,強調會唔會出現水浸呢,則除咗要睇雨量之外,亦要考慮落雨速度、當區渠務狀況等因素,所以就算係黃雨,都係可以水浸㗎。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載