› 選擇地區
三藩市
紐約
洛杉磯
其他美國地區
香港 台灣 北美
 
2018年05月23日

爆相爆片:連偷兩張牛肉乾
金毛愛找數定靠害?

有咩比違例泊車俾人抄牌更慘?就係唔知俾人抄咗牌囉!因為分分鐘會俾人通緝㗎!住喺大埔富亨邨嘅讀者阿華,喺上周四發現停喺頌雅路架車食咗牛肉乾,諗住繼續擺喺車頭,等阿Sir畀畀面,唔好再抄,點知第二日竟然發現張牛肉乾離奇失蹤。

相關新聞:屬政府財物 可判囚10年

清晨出沒 犯案前先踩線

阿華翻睇車cam,佢當堂嚇咗一跳,從片段所見有位衣飾搭配都幾特別嘅金毛背心紅鞋阿叔,喺上周五朝早6點半左右,走到佢架車車頭,望咗5、6秒後閃人。阿華後來先知道,佢呢下動作只係「踩線」!過咗10分鐘,金毛怪漢又登場,佢首先係前面架貨車車頭位置,跟住再行去阿華架車嘅車頭。呢個時候,金毛怪漢將一張白色嘅紙「左手交右手」,唔排除佢右手揸住張白紙,就係喺前面架貨車偷嚟嘅牛肉乾。金毛怪漢行到阿華架車車頭,然後用左手偷埋原本放係阿華車頭擋風玻璃前嘅牛肉乾,跟住施施然走人。
阿華話早排幾乎晚晚都俾人抄牌,但就係近一個星期,好似淨係收得兩張告票,唔排除已經俾人攞咗好多告票,都唔知應該要畀幾多張告票罰款好,所以好徬徨。計小記話,可能金毛怪漢想做吓好事,幫你找咗條數佢呢?雖然可能性就唔大。
警方發言人就事件表示,警方會在區內一帶加強巡邏,如發現任何違法行為,定必採取適當嘅執法行動。任何人如就該案件有任何資料提供,請致電3661 3610與大埔分區人員聯絡。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載