› 選擇地區
三藩市
紐約
洛杉磯
其他美國地區
香港 台灣 北美
 
2018年05月22日

隔牆有耳:追問公務員愛國心
元秋叫羅智光solo國歌 - 李八方

向來言論出位嘅民建聯立會議員蔣麗芸噚日喺立法會一小組會傾到公務員培訓問題時,又語出驚人,包括要求公務員學院選址喺大嶼山同離島,話咁樣可確保公務員有個環境好啲、大啲嘅地方學習。在席嘅公務事務局長羅智光聽完忍唔住笑,話如果安排學院喺咁遠嘅地方,對同事上堂同返工都有困難,所以目前選址都係集中喺巿中心交通方便嘅地方。元秋聽完好不滿質問羅:「大嶼山交通方便吖!知唔知每日幾多巿民喺大嶼山出嚟返工?」

促查公務員有冇回鄉證

元秋又話,自己對好多政府新招聘或現任公務員係咪熟悉《基本法》有好大疑問,話同啲高級公務員交流過,發覺佢哋對「《基本法》大精神」唔太清楚,問羅智光係咪有啲公務員從未返過大陸?咁騎呢嘅問題,羅智光聽完唔笑先出奇,但佢都回應話,話政府有成18萬公務員,有人未去過大陸唔出奇呀。
點知元秋未死心,追問局長有冇公務員返大陸嘅數字、局方有冇鼓勵公務員要返大陸?羅智光話當局冇呢啲數字,亦唔會限制公務員返大陸,點知元秋就叫當局向18萬公務員進行不記名調查,問吓佢哋有冇回鄉證以及識唔識唱國歌喎。好戲在後頭,佢最後自爆,原本諗住噚日即場考羅智光同公務員事務局常任秘書長周達明同公務員事務局副秘書長陳瑞緯識唔識唱國歌,但由於發問時間已夠:「我今次唔考,下次先考你哋!」唔知在席嘅羅智光係嚇死定笑死?怕且一眾局長甚至公務員,都要加把勁練定國歌,迎接元秋嘅挑戰咯!

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載