› 選擇地區
三藩市
紐約
洛杉磯
其他美國地區
香港 台灣 北美
 
2018年05月19日

爆相爆片:
錫完摑 碌地打 再攬攬
情侶街頭上演 愛情MMA

雖然話「打者愛也」,但唔通真係愛者打多幾下?照咁嘅理論,紅磡呢對情侶就一定愛得好深,仲好激烈㖭!
住喺紅磡崇安街嘅讀者Candy,星期四(17日)凌晨1點幾,喺屋企睇緊電視時,聽到樓下傳來嘈交聲,因為附近經常有南亞人士爭執,Candy起初都不以為意,點知嘈嘈吓,傳來廣東話,於是行埋窗邊睇吓發生咩事,嘩!原來係一對情侶上演摔角……呃,係打交先啱!

女友爆粗:癲X完未?

片段顯示,男嘅好大力咁,將女友拉埋自己身邊,女友最初坐咗喺男方大髀,男友又攬又錫,以為佢哋和好如初嘅時候,戲肉就嚟喇!「你癲X完未呀?」女友突然爆出呢句,男友即刻攬住女友一個反身,女友跌咗落地下,仲飛甩咗隻鞋,女嘅着住熱褲,咁樣跌法,真係睇到都覺得痛。
呢個時候,女仔想起番身,但男方左右開弓,摑咗女友兩、三巴,仲成個人壓住女友,有附近住客見唔對路,大聲嗌落嚟「做乜嘢呀?」女仔亦隨即大叫「救命呀!」「你打完未呀?」男方似乎飲咗酒,講嘢有啲口齒不清,仲同個女仔講「過嚟隻揪吖!」喂!你摑完人又撩人隻揪,咪蝦女人喎!不過佢轉頭又攬番人,真係一啖砂糖,一啖屎!之後,個女仔頂佢唔順離開,男方都有跟住。
不過Candy話,兩個人之後又番轉頭,仲俾到場嘅警員拉咗返差館。Candy目擊過程,覺得好震驚,「點可以咁打個女仔?一巴二巴摑落去喎。」警方就話,一名有酒氣的25歲姓鄭男子,與30歲姓劉女友人因事爭執,調查後兩人均報稱沒有受傷,案件列作醉酒人士。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載