› 選擇地區
三藩市
紐約
洛杉磯
其他美國地區
香港 台灣 北美
 
2018年05月19日

【動人心言】
盼毛孩老有所依 50後追夢建安老院

「每年嘅生日願望,就係整個安老院!」洪太摸住超過10歲嘅唐狗阿B,邊笑邊講,「每一隻我哋收養嘅狗,一定養到終老,保留骨灰,希望將來有個地方可以種植物,當生命延續又好,當留為紀念都好。」

45歲洪太同60歲丈夫係fb專頁「老有所依動物村-洪家棣 - Tai」嘅版主,佢哋目前合兩人之力,收養咗26隻毛孩,當中過半已經年過10歲。正如fb專頁嘅名稱一樣,洪生洪太希望每隻毛孩都老有所依。

老狗,唔可愛,多病痛,總有人會選擇遺棄,而洪生洪太就選擇收養,佢哋話,「bb狗好多人爭住要,老狗就畀人揼出嚟。雖然養老狗,相處時間短,會唔捨得,但係佢哋被遺棄嘅時候,乜都無晒,至少畀佢哋帶住愛咁走,希望佢哋記得有阿媽阿爸錫!」

洪太自細就跟住爸爸去餵流浪狗,一餵就一世放唔低,「我唔會理佢哋係咪皮膚病、係咪聾、係咪盲、係咪跛,總之我覺得佢哋好慘,就會帶返屋企。」不過,搞「老有所依動物村」嘅概念,係源自洪太養嘅第一隻老狗阿妹。阿妹性格孤僻,無乜人理,洪太見佢好可憐,就每日攞麵包同狗糧餵佢。最初,洪太放低食物,遠處睇住阿妹食,持續餵咗三四個月,終於可以伸手摸吓佢。後嚟,洪太畀業主迫遷,好擔心日後無人理阿妹,就決定抱佢返屋企一齊走,「當時朋友見到就話『有冇搞錯呀?整隻咁老嘅返嚟,放返出去啦!』我就話想畀佢嚟養老。」阿妹入咗屋之後好嗲,洪太話當佢踎低,阿妹就會將頭放喺佢膊頭,覺得好溫馨!呢個經歷令洪太萌生收養更多老狗嘅念頭,而洪生無反對,仲身體力行支持太太嘅諗法,「我同太太都係傻㗎!」洪生一句說話,令太太笑逐顏開。

洪生,同樣係愛狗之人,周末會去燒烤場收集食物,拎返屋企再煮,拎出去餵流浪狗。過往,洪生係狗場嘅經濟支柱,做地盤燒焊嘅主管,收入尚算可觀。可惜,近半年身體出現問題,患上強直性脊椎炎而引發嘅虹膜炎,眼睛唔可以喺強光之下工作,導致失業,目前惟有靠積蓄同有心人嘅捐助作支撐。

洪生洪太話就算環境點差,都會以照顧毛孩為先,因為更差嘅時間都經歷過,狗狗對佢哋仍然不離不棄。沙士時期,係洪生洪太人生最低潮,搵唔到工,連飯都無得開。洪太記得當時只係食四蚊一條司華力腸,捱足一日,無錢買狗糧,就去肉檔問人攞肉碎,狗狗都係兩三日先食一餐飯。當時,佢哋住喺山上嘅泥屋,毛孩都係放養,無一隻因為無得食而離家出走,反而陪佢哋一齊捱窮,洪太話,「一齊捱窮喎!人都未必做到啦!」

洪生洪太為咗啲狗,租住地區非常偏遠嘅村屋,最近,佢哋住嘅地方出現地陷,地面凹凸不平,不適合狗狗走動,加上業主加租,佢哋決定要搬走,喺6月前嚟一次大遷徙。佢哋喺大埔搵咗一個非常荒蕪嘅地方,野草橫生,需要剷草、做基建兼起屋,建築成本約30萬。

失業嘅洪生坦言入咗困局,「捉襟見肘!」不過,洪生仍然保持微笑咁話,「香港人好有韌性,我哋有信心過度到。」洪太都話,只要同毛孩一齊就無有怕,仲可以趁呢個機會,真真正正打造一個「老有所依動物村」,有居住嘅地方,有務農嘅耕種區,「未來我哋希望可以做到自給自足,不假外求。」

最後,洪太好想呼籲大家請勿遺棄,「老實講,兩個人可以照顧幾多隻老狗?唔好諗住狗狗老咗,就揼嚟畀我哋,養動物係一生一世嘅承諾,你帶咗佢哋返屋企,佢哋就係你屋企人,希望各位主人負責任。」

老有所依動物村-洪家棣 - Tai
https://bit.ly/2Geg4qR

記者:阿仙
攝影:何建忠、伍嘉亮、李錦鏵
航拍:Sami Lee
後期:Jackal
編導:Jackal
編審、監製:阿仙

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載