› 選擇地區
三藩市
紐約
洛杉磯
其他美國地區
香港 台灣 北美
 
2018年05月11日

爆相爆片:凌晨出沒舊樓走廊
賊偷底褲 聞一聞提神

「聞一聞,好醒神?」土瓜灣東興大樓舊年起有變態賊不斷喺走廊偷女士胸圍底褲,搞到女居民人心惶惶,有住戶為咗搵出真兇,先後買咗3部保安閉路鏡頭緝兇。皇天不負有心人,禮拜二凌晨終於拍到一名光頭賊的廬山真貌,仲拍到佢當場「聞一聞」條底褲先偷,條片upload埋上網後,光頭佬即刻變網絡紅人。居民話𠵱家至少已有兩個底褲賊容貌曝光,希望警方可以盡快捉到人。

相關新聞:專家:戀物癖或因得不到性滿足

似shopping揀衫

居民謝先生同《蘋果》爆料,話一梯13伙嘅東興大樓每晚深夜至凌晨都冇保安員,好似冇掩雞籠,加上寓所唔夠位,居民習慣喺走廊晾曬內衣褲,但舊年開始不時都有賊深夜嚟偷胸圍底褲,搞到女士們包括謝太好無奈。謝生話舊年喺走廊裝第一個cam後,4月曾影到一個四眼仔偷內衣褲,但畫面唔夠清楚;後來買咗第2個cam又壞咗,唔服氣下今年買咗第3個cam,終於畀佢喺星期二凌晨4點影到一個光頭佬偷內衣褲。
條片見到光頭佬喺走廊偷咗一條大媽款女裝底褲後走埋一邊,聞一聞條底褲。謝先生當時聽到異聲開門查看,光頭佬已經走咗。但光頭佬唔死心,約5分鐘後返轉頭,好似shopping咁喺堆衫入面揀吓摷吓,最終被謝生喝走。
小記呢兩日訪問上址多名女居民,佢哋都話好擔心,擔心偷底褲賊會變本加厲,尤其是大廈後樓梯出現咗好核突的污迹。多名九龍城CID擒日去大廈調查,仲同居民攞咗賊人嘅相及片,希望警方盡快拉到人啦!
■記者劉柏麟、翁鈺輝

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載