› 選擇地區
三藩市
紐約
洛杉磯
其他美國地區
香港 台灣 北美
 
2018年05月08日

爆相爆片:
經Autotoll闖香隧 
單車男嚇窒貨車 大巴

近年全城掀起單車熱,經常見到單車喺馬路穿梭,上星期六下晝兩點幾,剛考完DSE嘅鄭同學同朋友去完赤柱玩,坐車出九龍行經香港仔隧道收費亭,就見到架Road Bike(公路單車)喺旁邊出現,經過Autotoll駛埋入隧道,搞到旁邊啲大巴同貨車即刻減速,以免掃低架單車釀成意外,佢話見到呢一幕,真係戥單車男擔心。
鄭同學話,個單車男好似係金髮外籍,戴晒頭盔,黑超同手套,仲着住一套顏色好鮮艷嘅緊身衫褲,好鬼專業,雖然單車車速唔高,但就感覺好危險,「就算(單車)靠邊行,有咩意外,後面嘅車有可能會dup唔切!」後果不堪設想。由於鄭同學坐嗰架車行咗快線,同架單車嘅距離越拉越遠,佢雖然係咁擰轉頭望,但架單車最終消失於車海中。
單車教練梁志賢話,單車若駛出馬路便要遵守交通規例,如在馬路行駛時要與大型車輛保持距離,仲禁止駛入收費隧道及快速公路,當局會豎立禁上單車及行人使用嘅路牌,至於事件中單車男踩住嘅Road Bike價值3萬幾蚊,相信單車男係發燒友。

闖隧道可罰$5,000囚半年

香港仔隧道公司回覆《蘋果》話,隧道管道內有閉路電視及員工監察,若發現有單車或行人進入隧道會截停,並票控相關人士。誤闖隧道者最高可罰款5,000元及入獄6個月。隧道公司又指,上周六下午未發現有單車進入管道、但同日傍晚6時幾,職員就截停咗一架單車啦。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載