› 選擇地區
三藩市
紐約
洛杉磯
其他美國地區
香港 台灣 北美
 
2018年05月07日

爆相爆片:
巨鼠玩轉星巴克 
外籍男一棍KO

咖啡店有巨鼠橫行!讀者黃生上星期四晚同女朋友喺尖沙嘴北京道一間Starbucks(星巴克)嘆咖啡之際,遇到驚險一幕,就有隻肥老鼠出現!黃生指當時一面忙於護花,一面攞手機影低隻老鼠。佢話隻肥老鼠好鬼敏捷,喺Starbucks裏面走嚟走去、跳上跳落,嚇到啲女客人尖叫求救甚至逃亡。幸最後有外籍顧客出手用掃把將老鼠就地正法,大家至鬆一口氣。Starbucks回覆時承認事件,指事後已安排清潔公司在店內消毒。

用力太猛 打爛掃把

黃先生話當日係同女朋友去咗北京道太子集團中心地庫嘅Starbucks分店,佢哋坐埋一角慢慢傾,突然黃生發現「有隻老鼠跑咗去前面嘅凳底,之後老鼠又爬上另一張凳,然後又爬落地走嚟我面前」。佢話老鼠現身一刻,附近顧客均大吃一驚,「左右兩邊嘅人即刻走,左面兩個女仔仲即刻攞起行李3秒內衝出去!」跟住有個男職員攞住掃把同鏟出嚟捉老鼠,但依然係完全冇佢辦法,隻老鼠好似濕水欖核咁當咖啡店係屋企走嚟走去,個男職員「喺左面角落頭拍完佢,又走去右面角落頭,喺右面角落頭拍完佢,佢又走番去左面」,老鼠仔好鬼生猛,有時仲爬上牆。
搞咗10至15分鐘,有個女顧客睇唔過眼出手幫忙攞起兩個掃把想左右夾攻咁捉老鼠哥,但都係失手。最後好彩有個黑皮膚外籍男人出嚟,攞住掃把同鏟嚟捉老鼠,孔武有力嘅佢兜頭打中老鼠,鼠哥即刻上天堂,但係用力太猛,連把掃把亦打爛。佢話之後有人執走老鼠屍體。
Starbucks發言人回應強調顧客安全一直是星巴克的首要考慮,當晚喺尖沙嘴太子集團中心分店發現外來老鼠後,職員立刻處理,事後已安排獨立專業清潔公司在店內進行全面消毒,確保分店衞生安全。發言人強調今次只係個別事件,星巴克全線分店一向注重衞生及清潔消毒。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載