蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年05月03日
馬上成為壹會員

隔牆有耳:無限回帶之戰
記仇者CY又插梁繼昌 - 李八方

民主黨發起天下為公行動追究前特首梁振英收UGL 5,000萬事件,又要求梁振英公開佢同UGL事件相關文件,不過梁振英冇理之餘,仲向天下為公發律師信想人收聲,不過天下為公冇有怕之餘,仲講明會追究到底。原本八方以為梁振英會再出招嚇天下為公,點知佢忽然拎番成年幾前同佢有誹謗官司未了嘅立會議員梁繼昌(Kenneth)嚟講。
原本政界等緊梁振英有乜新招反擊天下為公,點知佢噚日喺facebook發文,不過就唔係回應民主黨或天下為公,而係再講番梁繼昌,回應舊年Kenneth喺記者會入面話佢接受香港同外國稅局調查,不適宜出任全國政協副主席言論,屬嚴重誹謗,並且再講一次冇收過任何稅局任何查詢,更遑論調查,要求梁繼昌收回有關指控,又話梁繼昌對佢呢個要求回應或者不回應,將來都要請法庭一併考慮。

梁繼昌:交律師處理

其實梁振英已就呢件事入稟告梁繼昌誹謗,所以Kenneth真係冇乜好講,佢喺fb發文話,因為佢同梁振英嘅民事訴訟已進入司法程序,雙方任何睇法同立場,應該交畀雙方律師團隊循法律程序處理,而好多網民就留言支持Kenneth。
有政界中人話,其實呢單嘢已經去咗法庭,梁振英因單案對Kenneth提出乜嘢要求,正路應該交由雙方律師處理,用fb提出真係唔知係乜嘢玩法?不過佢奇怪,明明之前梁振英起晒鑼鼓郁天下為公,為乜發完律師信後,人哋當佢冇到,梁振英唔立即出手告天下為公,反而去搞梁繼昌?

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載