› 選擇地區
三藩市
紐約
洛杉磯
其他美國地區
香港 台灣 北美
 
2018年04月27日

爆相爆片:
先達店疑晒「黃牛磚」 
子華fans圍剿籲罷買

先達手機店「轉型」炒黃牛飛?黃子華宣佈棟篤笑加場,15萬張公開發售門票日前依然係一天沽清,唔少擁躉仲係未買到飛,苦不堪言。就喺呢個時候,有人爆料先達一間樓上手機店前晚突然喺fb貼出相片,相中可見6大叠「磚頭飛」,估計當中有超過200張黃子華棟篤笑門票,個post仲笑言話相中嘅票係「今日戰績」,即時畀網民話佢哋係炒黃牛飛,紛紛留言聲討,同時亦激嬲咗大批子華fans。

店員稱轉貼自fb

該6叠黃子華棟篤笑門票,日期分別係7月6、21、27同28號,雖然有小量網民即時留言問門票「幾錢?」,但更多網民留言鬧爆嗰間手機店係「集團式黃牛黨」,有人怒斥「今次關公都幫你唔到」,亦都有子華擁躉留言引述黃子華早前為打擊黃牛當做嘅公開呼籲:「寧願個位吉,都唔好益黃牛!」不少網民都話,先達手機舖平時炒貴晒啲iPhone圖利已經乞人憎,𠵱家竟然撈埋炒門票,覺得忍無可忍,一時間群情洶湧,至前晚10點幾,該手機店已經將「今日戰績」張相刪除,但仍難息眾怒,店方fb續有人留言辱罵。
記者噚日傍晚到先達了解,發現該樓上手機店仲照常營業,記者問店員施先生有冇賣子華門票時,佢就有啲無奈,解釋話喎:「我只係見到網上有張咁嘅(大叠門票)相,於是轉貼上fb箒……講笑咋,我真係冇賣(黃牛)賣㗎。」佢又話喺網上點解釋都冇用,所以最後決定刪咗張相。記者就發現無論大家信唔信佢嘅解釋,黃牛票問題始終未解決,噚日繼續有開價1.5萬元黃牛飛,睇嚟要修例先有機會杜絕到黃牛黨。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載