› 選擇地區
三藩市
紐約
洛杉磯
其他美國地區
香港 台灣 北美
 
2018年04月26日

爆相爆片:薄扶林鐵皮屋 火龍狂舞

每年中秋都會上演舞火龍嘅香港仔薄扶林村,周二晏晝5點幾出現咗條大火龍,仲燒着一間鐵皮屋。村民陳先生提供嘅片段,見到着火嘅村屋同花園已經火光熊熊,濃煙沖天,陳生住喺火場隔籬,嚇到個心離一離,「火勢好勁,煙好黑,又有風,驚石油氣爆炸呀!」村民都好緊張,即刻報警,好彩消防員好快就嚟到。因為條村嘅屋都幾密吓,火燒連環船就好大鑊,好多居民要臨時疏散,好彩場火好快已經救熄,總算有驚無險。
陳生話起火間屋係兩婆孫住,火頭喺屋外嘅花園仔裏面,聽聞好似話係部抽濕機短路起火,波及埋旁邊鄰居間屋,結果兩家人都痛失家園。據聞有一位婆婆見到咁大火即刻喊咁口,似乎係屋主,現場仲有位女士,唔舒服要送醫院,其實錢財身外物,最緊要係人冇事!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載