› 選擇地區
三藩市
紐約
洛杉磯
其他美國地區
香港 台灣 北美
 
2018年04月26日

隔牆有耳:fashion嘅嘢女婿唔buy
余若薇愛車衫 老公慧眼識條呔 - 李八方

公民黨今個星期五舉行黨慶晚會,由於晚宴主題係同公民社會同行,所以冇請特區高官,唔會重演特首林鄭月娥舉手贊助一幕,但佢哋同樣有拍賣環節,近日已經喺網上發起籌款拍賣,最矚目嘅拍品,可能係前主席余若薇DIY、親自為小朋友度身訂做嘅童裝。

黨慶賣親製童裝

原來余大狀繼寫書法後,近期沉迷車衫,早前同老公去日本賞櫻都有大掃貨,掃咗一批靚布同靚紙樣返港,準備大顯身手。知情人士話呀,余大狀嘅沉迷程度,同亡國興剪布不相伯仲,都係「日以繼夜、夜以繼日」咁不斷「車、車、車」,質疑佢屋企部衣車,有冇停一停嘅時間?而余大狀曾經透露,車衫反而可以幫佢減壓。
據知余大狀嘅車衣技術日益進步,已經可以車裙、衫、褲同呔,外孫女當然係受惠者。講起車呔,即係真係落手落腳製作一條呔,據知余大狀係拆咗一條舊呔了解其構造,繼而照辦煮碗,但當中都有挫折,試過車條綠呔畀女婿,點知,女婿唔肯戴,令佢深明女婿唔易支配,始終都係老公最好,因為二話不說肯做佢model;余大狀除咗喺黨慶拍賣親製童裝,同時捐出墨寶為黨籌款。
至於法律界嘅郭榮鏗,原來都係煮家男人,今次會變身家廚,拍賣自己嘅廚技,即係成功競投者,可獲佢上門煮私房菜式,包括烤羊架同牛肝菌意大利飯,底價係4,000蚊。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載