› 選擇地區
三藩市
紐約
洛杉磯
其他美國地區
香港 台灣 北美
 
2018年04月25日

逾15萬飛所餘無幾
黃子華感謝Fans同工作人員:好感動

黃子華最後一次棟篤笑,合共開26場,共15萬張門票。

門票昨早10點於城市售票網公開發售。今次開售,同以前有啲唔同,就係次次撳到爛嘅F5,被廢武功。不過,網民依然無法登入,更一度疑似死server,至10點54分先開始回復正常。

昨早連場大雨,但無阻排隊黨陣容。逾百長者、大媽、南亞裔人士。兵家必爭之地——尖沙嘴金馬倫里通利琴行外,排頭位係一名南亞裔女子,胸前孭住嘅BB仲瞓緊,但當職員開門準備售票一刻,女子即解下孭帶,將BB放喺門外嘅BB車,就衝上去撲飛……

晚上近7時,黃子華透過經理人回應昨日售票情況,首先他稱要感謝一班落力喺售票處維持秩序嘅工作人員同保安:「喺唔同fans page同facebook,見到好多fans都分散排隊,好多都話呢幾日都有啲保安出嚟做登記,數下人頭。今次有關方面真係做咗好多嘢,所以聽到今日售票秩序維持良好,冇特別事發生,都好慶幸。」

子華方面又透露,昨日售賣嘅門票其實超過15萬張,但據佢哋了解,15萬門票已所剩無幾,得番一啲零碎位:「當日決定加場,犧牲休息時間,一次過推晒所有門票,根本冇諗、亦唔理係咪消化到,只係希望想睇騷嘅人,可以更多機會買到飛就得,所以有幾多推幾多。

「今日知道個售票情況,令我有『始料不及』嘅感覺。對於一班一早就去排隊、紮營買飛嘅觀眾,我真係好感動。見佢哋咁辛苦好唔忍心,慶幸知道今日好多人都可以買到飛。真係要再一次多謝一班維持秩序嘅工作人員。」

至於會否再加場,甚至加開日場,子華就稱,做一場「棟篤笑」消耗好多體力,亦都要顧及養聲,所以未有考慮。

相關新聞:門票最貴炒至1.5萬元

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載