› 選擇地區
三藩市
紐約
洛杉磯
其他美國地區
香港 台灣 北美
 
2018年04月06日

隔牆有耳:
倡鰂魚涌公園起樓 
泛民 建制 夾擊姚松炎 - 李八方

早前喺九龍西敗選嘅姚松炎,日前以房產研究中心嘅創辦人身份,建議將東區太古城一帶規劃成社區企業市鎮。點知呢個天馬行空嘅建議,一併激嬲咗民主派同建制派,兩派連日嚟接力發聲明嚴厲批評,姚松炎嘅建議被批至體無完膚。姚松炎當日發出嘅新聞稿,寫明「主要贊助」係賽馬會慈善信託基金,唔知馬會稍後會唔會俾政客們詐型呢?
姚松炎喺本月1日開咗個記者會,提出喺太古城附近嘅鰂魚涌公園較偏遠位置起樓,畀企業提供員工房屋,減輕市民來往居所同工作地點嘅交通負荷。佢又建議,喺東區走廊經往太古海濱一段嘅馬路上蓋位置興建露天平台,作行人專用區及休憩用地,讓居民來往太古及海濱。

新民黨轟插針起樓

本身係民主動力召集人、兼民主黨太古城西區議員趙家賢發聲明,表明反對有關建議,認為姚應先諮詢居民,以示尊重居民,話佢同區內另一位民主派區議員都冇被諮詢過,又話建議將影響太古城居民嘅景觀,居民感到十分厭惡同覺得家園受到侵犯,可見同一陣營都冇面畀。
民建聯東區支部接力批評姚松炎荒謬地提出天馬行空式嘅規劃,極度遺憾加強烈反對。立會選舉喺太古城最多票嘅葉劉淑儀,佢領導嘅新民黨噚日發聲明反對方案,話鰂魚涌公園係居民嘅重要活動空間,咁樣起樓即係「插針建屋」,嚴重破壞太古城社區完整性同環境,力斥方案脫離現實,漠視社區。盟友同政敵都唔撐,姚松炎今次點收科?

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載