› 選擇地區
三藩市
紐約
洛杉磯
其他美國地區
香港 台灣 北美
 
2018年03月24日

與主婦同被視為派錢方案大贏家
大學生不受落:基層更應幫

【補鑊拾遺之彈多過讚】
【本報訊】財政司司長陳茂波公佈財政預算案補漏拾遺措施,大學生和家庭主婦被視為派錢方案大贏家,但原來不少受惠者均認為4,000元用之不當或聊勝於無,僅好過「派海洋公園飛」,向財爺大潑冷水。不少大學生直言無逼切財政需要,意外之財只用於玩樂和「買花戴」,認為政府更應支援基層家庭;有主婦則批評當局「唔派又派」,毫無計劃,金額亦太少。
記者:鄧力行 梁珮珊 李雨夢

根據iPASS資料,2016/17學年,大學生及大專生(扣除非本地生)約有21.6萬人。中大學生會外務副會長陳偉霖表示,不少大學生均來自較富裕家庭,估計除了個別基層學生之外,大部份同學都會將4,000元用作玩樂花費,「去旅行、食餐好之類」。他指若果政府希望惠及基層,今次的安排達不到要求;若希望回應社會上「全民派錢」的訴求,現在又未能做到,認為措施是「兩頭唔到岸」。

相關新聞:推行倉卒 照稿讀仍甩漏

「我哋咪又係攞啲錢嚟玩」

就讀大學二年級的梁小姐則認為派錢方案的要求定得太闊,令到沒有需要的人也可以受惠,「好似我呢啲大學生都會攞到錢,但我哋咪又係攞嚟玩,主婦亦都可能好有錢,應該畀真係低收入嘅家庭」,又認為政府若果有錢應該用在更有需要的地方,例如醫療方面。
就讀大學一年級的李先生亦質疑政府做法是「用咗喺冇需要嘅人身上」,「對我呢啲冇需要嘅人嚟講真係冇需要, 但對於有需要嘅人,例如住劏房嘅人嚟講,一年4,000蚊點會夠呀」,他說獲得4,000元後,部份會儲起,部份會捐出去,身邊同學則大多打算用來去旅行及還學費。他又質疑家庭主婦未必需要津貼,「主婦嘅另一半可能好高收入,甚至高過家庭入息中位數,我覺得唔應該拎到,但呢啲人可能最後就係拎到」,認為政府應該將今次整筆金額放在全民醫保或「N無」人士身上。
就讀大學五年級(畢業年)的羅先生認為派錢屬「大包圍」,令真正需要及不需要這筆錢的人皆能領錢,「好似大學生咪即係賺錢買花戴」。他認為政府派錢金額由吹風的2,000或3,000元變成4,000元,標準混亂,「都唔知佢筆錢係點定出嚟」。

在職婦斥補救反映無計劃

理大學生會會長林穎恆則歡迎措施,認為是「有好過無」。他說大學生平日有很多開支,很多同學都要做兼職賺取生活費,對於津貼一定有需要,「至少好過派海洋公園飛」。他估計同學會將4,000元用於日常開支,包括出外吃飯或購物等。
本身是家庭主婦的吳太同時任職護士,與丈夫皆沒有物業,二人因為要供養4名年老父母,所以毋須交稅,將會獲得4,000元,但認為「派得好少」,「的確好過冇,但係派得少得滯,幫唔到」,她指會用4,000元幫補兒子的讀書開支。對於富豪太太亦可能受惠於今次派錢,她認為無問題,「我哋家庭主婦都要私己錢㗎」。不過,她認為財政預算案之前不派錢,現時才補救,可見當局無計劃清楚便推出預算案,「早就應該做好啲,就唔會要政黨要求做先做,無主動性無諗清楚做好計劃,DSE又係咁,推出後擔心個個都走去考,先至再修訂計劃」。

相關新聞:行政開支料逾4億元派錢方案複雜 恐2020才落袋

識睇睇留言

【Lam Dicky】大白象工程就亂咁花,還富於民就守財奴。
【FraNk Chan】點解要搞到咁複雜呢?咁搞法admin cost(行政費)仲貴過派嗰舊錢。
【Ray Leung】派錢派到人人畀嬲真係香港獨有,學吓澳門點派啦!
【Ed Lam】係都唔肯直接派錢,明明有條直路佢係都要兜路,又要申請又要聲明又要乜乜乜,呢啲咪官僚主義兼擾民囉!
【Wins Wong】整色整水,全民回水一萬最實際。
【Kelvin Chan】其實就係因為覺得高官太廢做唔到嘢,所以先會覺得派錢好過。
【Jacky Choi】咁樣叫補漏,不如搵人幫你(陳茂波)個腦補洞好過啦!
【鄭美子】四千蚊派咗出嚟大家happy一陣,但社會問題從沒解決過,掩口費而已!
資料來源:互聯網

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載