› 選擇地區
三藩市
紐約
洛杉磯
其他美國地區
香港 台灣 北美
 
2018年03月24日

隔牆有耳:
大灣區大旅行 建制派內訌
去深交所定高球場?「睇長隆啦」 - 李八方

張華峰

立法會內務委員會噚日商討下個月去大灣區考察嘅事。照計喺大灣區呢個課題上,建制派應該舉腳贊成,點知因為行程問題,搞到經民聯內訌,仲要民主派幫手做和事老,真係估都估唔到。

林健鋒不甘硬食投訴

噚日內會傾到大灣區考察嘅時候,民主派都冇乜意見想表達。反而金融服務界嘅張華峰就率先舉手,反問點解唔趁機去埋深圳交易所睇睇,事關金融業係大灣區嘅龍頭產業,仲講明話「我同Jeffrey哥(經民聯林健鋒)講咗兩次喇!」
就係咁,身為考察團團長嘅林健鋒就硬食咗張華峰一嘢,當然佢不甘示弱,解釋佢收到張華峰嘅意見,之不過考察團3日行程都好緊密,有人話想睇深圳灣口岸一地兩檢、有人又話想睇高球場,所以未能盡如人意箒。
林健鋒一駁嘴,立即令張華峰更躁,再舉手話,拎高球場同深交所做比較,「貶低咗我哋(業界)嘅重要性呀!」鬧到咁僵,旅遊界姚思榮唔知想打圓場定係火上加油,佢話不如睇埋長隆野生動物園啦,可以比較吓香港同內地嘅旅遊景點吖嘛。
好彩,呢個時候身為財經事務委員會主席嘅專業議政梁繼昌開聲,表示會積極考慮張華峰嘅意見,跟手畀埋下台階,叫張華峰喺事務委員會提出,佢就會積極跟進。就係咁,一場一觸即發嘅黨友矛盾先得以化解咋。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載