蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月22日
馬上成為壹會員

潛伏新義安行動組 令14人定罪
卧底兩遭紅棍疑是「鬼」

【本報訊】警方於2014年派出卧底潛伏葵青及荃灣黑幫,成功拘控一批男子。繼本周一有8人認罪後,昨再有6人承認另外17項自稱三合會成員等罪名。案情透露卧底探員於行動期間曾多次遭案中被告懷疑其真正身份,更有「紅棍」對他直言:「我覺得你係鬼嚟。」卧底屢次化險為夷,最終在眾人被捕後指認出各人。
記者:楊家樂

昨日認罪6名被告為關鈃勻(21歲)、李錦秋(59歲)、黃根財(39歲)、管世傑(47歲)、廖立人(40歲)及蔡思良(50歲),分別報稱電腦維修員、退休人士、裝修工及運輸工等,案件押後至6月7日求情。另一名報稱商人的39歲被告陳國熙則不認罪,案件今日開審。

促到拳館學舞獅貢獻社團

警方於2014年8月派出化名「阿Joe」的卧底探員滲入葵青及荃灣黑幫,首先認識已於本周初認罪的男子陳繼豪。11月1日,卧底獲陳邀請到一間餐廳與李會面,李向卧底說:「我大環山老新嘅,財哥(即被告黃根財)係我老表。你哋掛朵跟財哥,我就係你哋二叔。」李又謂:「我係棍嚟,遲啲齊人一次過出老尖做儀式。」
數日後李向卧底介紹黃:「呢個就係財哥,你大佬。」黃則對卧底說:「如果你做得好,有機會好似我咁,紮職㗎。我係426棍嚟,畀心機喇,我睇好你。」三合會專家指等於自稱為新義安紅棍。同月29日,李向卧底介紹拳館師傅「寶哥」陳國熙,陳要求卧底加入拳館學舞獅,以對社團有所貢獻。但當晚李及陳一度質疑卧底的真正身份,李查問卧底後說:「我冇話你係鬼,只要你哋忠心為公司就得喇。」
翌月9日,在一個新義安成員生日會上,黃對卧底說:「阿Joe,老實講,我覺得你係鬼嚟。」卧底答:「我唔係。」黃說:「咁你要證明你自己唔係鬼喇,我𠵱家畀個柯打你,你同我收班死士返嚟,我要你做行動組,有冇問題?」卧底答:「我盡做啦。」最終行動於2015年7月公開,卧底於認人手續中認出各被告。
案件編號:DCCC424/17

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載