蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月22日
馬上成為壹會員

隔牆有片:惡客大鬧九巴 打仔爆粗扯司機口罩
網民錯重點:車長好靚仔 - 李八方

車長唔易做,開得太慢或太快都捱鬧,遇到唔好品嘅乘客仲有機會遇襲。巴士車長WhatsApp群組近日流傳一段短片,片中可見一名九巴車長畀躁客粗言辱罵後報警,惡漢竟然郁手扯甩車長嘅口罩,唔只令車長臉部受傷,仲恐嚇話「揸呢條線小X心啲」,但車長處變不驚冇被挑釁,唔少網民力撐車長「克制、專業、做法正確」,仲錯咗重點同聲大讚:車長好靚仔呀!
呢位貌似丁子高嘅車長姓霍23歲,19日下午5時半駕駛由藍田開往烏溪沙嘅89D線九巴,駛至鯉魚門道時被一個中年男乘客以粗言辱罵,由於呢部巴士冇閉路電視,車長就將巴士停喺觀塘法院對開嘅巴士站,再用手機影低車內狀況,而喺佢報警期間,呢名躁漢強行拉低佢嘅口罩想影佢,涉嫌整傷車長塊面,仲話「咪搞X緊你啫!」語帶鄉音嘅妻子就嘲諷,「你上法庭告佢(我丈夫)吖笨!」

大讚車長淡定專業

雖然面對粗言辱罵兼動武,但車長不為所動,只點頭稱「哦」,反遭躁漢斥「變態」,而中港夫妻繼續喺車廂大吵大鬧,一時話要投訴,一時又煽動其他乘客聲討車長,而當時車上其他搭客不單冇制止,仲怪責車長唔畀佢哋喺警察到場前離開係「非法禁錮」,警方則喺接報後約9分鐘到場。
車長其後喺facebook親述當時情況,話呢對夫婦上車後勁打個細仔,佢要求對方教仔就返屋企教,唔好騷擾佢揸車,影響到全車人,點知呢對夫婦就發難,強調「我好希望同行嘅車長都受到應有嘅尊重!市民亦需體諒」。
網民幾乎一面倒讚車長專業,夠晒淡定應對挑釁,大鬧呢對夫婦無品,兼批港人唔幫手仲要怪個車長非法禁錮好自私,但更多人留意到車長好靚仔,單睇留言都感覺到唔少心心眼!警方回應話,呢名乘客涉嫌普通襲擊被捕,獲准保釋候查,下月中再到警署報到。
對於車長接連遇襲,九巴發言人嚴厲譴責襲擊行為,話會積極配合警方調查,公司法律部會全力協助受襲同事追究到底。為咗保護前線車長,九巴會喺短期內為全線車隊嘅車長駕駛室安裝透明防襲板,並加快安裝車上閉路電視,並會喺車廂內張貼告示,警告不可襲擊車長。

識睇睇留言

Ko Andy:好少男士稱得上俊,呢個車長就真係俊,手瓜又脹卜卜!
Siu Yuen Chan:司機冷靜專業,抵讚!
Apple Soo:其實做巴士司機都幾慘,勁受氣,啲人係咪都鬧個司機,就算邊個錯都係怪司機而唔係怪攪事果啲…………
Kwan Kinghong:車長風度值得一百個讚,有修養,對這類爛仔潑婦作出應有態度正確!祝這位靚仔司機全家人幸福美滿!

資料來源:《蘋果》資料室

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載