› 選擇地區
三藩市
紐約
洛杉磯
其他美國地區
香港 台灣 北美
 
2018年03月20日

八方相當年:唔使元秋編導
白鴿副主席最愛攬媽咪 - 李八方

勝出九西立法會補選嘅民建聯鄭泳舜以攬吓爸爸成名,身兼民主黨副主席嘅沙田區議員李永成(Wilson)唔使黨內元老教路,都好自然咁同媽媽抱抱,皆因佢喺單親家庭大,感激媽媽不辭勞苦,區選兩次敗選都起得番身,媽媽嗰種堅毅影響至深,所以就算幾忙都好,每星期都會抽時間同媽媽、婆婆飲茶食飯。
今年43歲嘅Wilson幾個月大父母就分開,對爸爸完全無印象,身為獨子嘅佢話唔孤寂,因為有幾個舅父陪佢,細個係奀皮仔通街走,「試過有次碌落山,婆婆同公公幫我手手腳腳搽晒藍藥水,突然變咗『blue blood』,哈哈。」

參加辯論更關心時事

Wilson喺橫頭磡邨住到小四搬入沙田。小學加入羽毛球、乒乓波同足球校隊,喺何明華會督銀禧中學讀書時,除上述三種球類,仲加入埋籃球隊。馬鞍山青年會學院讀預科時搞埋話劇組,攞過校際優異導演獎,沙田戲劇節更提名過最佳演員。
港大讀化學系,上莊辯論學會負責搞比賽,大三親身上陣參加辯論,打過兩大賽兼攞牌,令佢越嚟越關心時事,「訓練過程令我相信,道理同真理越辯越明」。佢話讀到大二已經覺得「我都唔係科學家」,有諗過畢業後教書或從事傳媒教育工作,指六四對佢影響好大,「當年屋企有50幾盒錄影帶,錄低六四嘅報道,嗰時開始有要捍衞民主自由嘅概念。」
98年畢業後任鄭家富議員助理,其後轉去出版社工作,2005至16年都係卿姐辦事處總幹事。2007年、2011年區選敗陣後,2015年終於喺沙田烏溪沙擊敗建制派吐氣揚眉。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載