› 選擇地區
三藩市
紐約
洛杉磯
其他美國地區
香港 台灣 北美
 
2018年03月17日

隔牆有耳:
再爆初選內幕後 一齊落區謝票 
基哥姚松炎握手和好? - 李八方

基哥同姚松炎喺石硤尾謝票時未見面左左,仲嚟個世紀握手㖭。夏家朗攝

民主派因為1月份初選搞到各派分裂,九龍西更因為Plan B嘅爭議,搞到民協馮檢基退選,𠵱家補選完咗,姚松炎亦不幸落敗,阿基終於唔再忍,向傳媒再爆初選點俾人逼退。咁啱民協噚日安排基哥同姚松炎去到石硤尾謝票,兩人碰面雖未見面左左,但似乎冇乜交流。姚松炎噚晚仲去埋民協新春晚會,其間上台同基哥玩,咁係咪已大和解?有份去晚會,亦係新東補選畀DQ嘅陳國強喺fb留言話:「上個月,好多人一齊玩基哥,今日上台話大和解?!基哥好似聽唔到!」
基哥日前接連接受傳媒訪問,大爆初選被逼退內幕,又抱怨成個過程唔公平,之後傳出姚生會向基哥親自道歉,而姚松炎噚日咁啱同基哥一齊去到石硤尾謝票,八方梗留意姚生有冇向基哥親自耍冧。
姚生因為上一站謝票行程延誤遲到,搞到基哥有少少面燶。後來人齊,佢哋講笑咁話要一齊叫口號,於是幾個人就一齊叫「支持姚松炎、支持基哥」咁,當時姚生亦趁機同民協主席施德來講「唔好意思,贏唔到」,但握手之外,未見佢同基哥有交流,基哥亦因為有事提早離開。

姚生:會向基哥致歉

咁姚生有冇向基哥親自道歉?姚生同八方講,係因為自己選舉失誤輸咗議席,所以要向支持者致歉,「當然包括基哥喇,因為佢都係我哋支持者呀」,至於有冇面對面道歉,就要佢兩個人先知喇!其實八方留意到謝票期間,有唔少人同姚生握手鼓勵,亦有人送上心意卡,又話會同民主派各板塊會面,聽取唔同人意見,先決定日後會唔會再參選喎。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載