蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月09日
馬上成為壹會員

【世紀大發現】
塞車因為車多?彪彪究竟搞邊科

星期三北區嚴重塞車,數以千計市民喺車站打蛇餅排隊等車,有巴士乘客更寧願落車,沿粉嶺公路路肩步行離開,角逐新界東補選議席嘅工聯會鄧家彪,對小市民受塞車之苦表達無限同情,就喺塞車期間,在fb發文溫馨提示居民交通情況,話根據運輸署網頁訊息,今次上水大塞車是因為車多關係,令北區居民經常受塞車之苦。

鄧家彪咁貼心,網民卻似乎唔多領情,留言質疑鄧家彪呢個「大發現」,指「Wa!真係唔講都唔知塞車因為車多呀!」亦有人指「呢個真係世紀大發現呀!下屆諾貝爾獎仲唔係你拎!」

比較感恩嘅市民,就話「好彩你話我知塞車原因,我諗左成晚都諗唔到,搞到瞓唔着。」而似乎係工聯會支持者就大讚:「彪哥,你真係做實事嘅人。你唔講,邊有人會諗到塞車會係因為車多。另外,我相信佔中嘅蝴蝶效應都係其中一個原因。」獲得咁多市民熱烈回應,八方相信如果鄧家彪補選勝出,原因一定係選票夠多!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載