› 選擇地區
三藩市
紐約
洛杉磯
其他美國地區
香港 台灣 北美
 
2018年03月07日

隔牆有耳:促訂辱警罪 曾偉雄北上交功課
網民挑機︰應設辱民罪 - 李八方

雖然卸任警務處處長,但前一哥曾偉雄仍然好有霸氣,身為政協委員新丁,首次北上兩會亦發圍,接受傳媒訪問時話要做好青年工作,直言呢個係政協嘅「政治任務」,亦力促盡快設立辱警罪。八方想話畀大家聽︰禿鷹冇做錯到!國家畀得政協位佢,梗係要瞓身回報,尤其阿爺叫政協多發聲,禿鷹點可以唔交功課?唔少網民力促設立「辱民罪」,唔知禿鷹又點睇?

國家有任務 做好青年工作

身在北京嘅曾偉雄接受《星島日報》訪問時話呀,期望透過政協呢個平台做好青年工作,令年輕人唔好抗拒國家,直言呢個係政協嘅「政治任務」,「要令青年明白愛國愛港的重要,明白作為中國人的意義」,指近年出現「港獨」、「自決」、衝擊校園等行為,情況令人擔憂。
作為前一哥,點可以唔為同袍開腔?禿鷹同時提及支持盡快訂立辱警罪,認為此舉對警察同市民都是係好事,唔擔心被批評削弱人權自由,反問:「難道辱罵人都是自由?」有人質疑警隊作為紀律部隊,唔係接受過專業訓練控制情緒咩?禿鷹解釋人人嘅EQ都唔同,有啲人EQ未必咁高,但唔代表可以被辱罵 ,「控制情緒同接受被人公然侮辱,是兩回事,如果你接受被人公然侮辱,整個社會的道德就會崩潰」。
禿鷹向來好惹火,網民紛紛論喺網上同佢開拖,唔少人就話警察係人,市民就唔係咩?反建議增設「辱民罪」,保護市民免受警察侮辱,亦有唔少人翻警隊舊賬,質疑辱罵有罪,亂打人就無罪?

識睇睇留言

Winston Mok:可以增設辱民罪嗎?
Kenny PY Leung:乜嘢公然侮辱呀,你睇到黑影嚟咋喎。
Ricky Chan:辱罵有罪,亂打人就無罪?
陳文豪:點解西方國家都有辱警罪?咁你又唔問吓點解西方國家可以有普選、公職人員行使權力有制約
Lui Man Tat:差佬有特權?點解唔加侮辱巴士司機罪,侮辱的士司機罪?
資料來源:《蘋果》網站


李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載