› 選擇地區
三藩市
紐約
洛杉磯
其他美國地區
香港 台灣 北美
 
2018年03月05日

15年前失去爸爸
遺雛3年唔識笑
走出沙士陰霾成胡琴家

【沙士15周年】
【本報訊】2003年,香港人永遠無法忘記的一年。一種前所未見的神秘病毒由廣東突襲香港,歷時逾百日,感染1,755人,奪去299條寶貴性命。那年,醫護面對全新沙士病毒有如摸黑對敵,病人徘徊生死邊緣,有人戰敗不幸離世,有人突然痛失家人,但疫潮將港人連繫,各界齊心。15年過去,經濟已由谷底反彈,樓價以倍計上升,《蘋果》推出系列報道,再次重返疫情主要現場、走訪前線沙士英雄、當年瀕死的醫科生、沙士遺雛以至出售抗炎三寶的藥房老闆。不論是復康者或沙士家庭已走出陰霾積極生活,沙士病毒仍在內地出現未完全消滅,期望港府能作好防疫準備。

相關新聞:不搬離淘大 「畀咗好多記憶我」

「一齊抹屋、一齊洗冷氣……係我同佢(父親)最後相處嘅一個奇怪時刻」。香港中樂團特約樂師、青年胡琴演奏家胡兆軒的父親,2003年感染沙士離世,確診到死亡不過一個月。胡父去世頭幾年,胡家每天在愁雲慘霧中度過,幸得各界幫助終走出陰霾。回首15年,兆軒感嘆,「當佢(沙士)係意外,大家都唔想……生老病死人人永不落空,係早嚟遲嚟」。
兆軒於2003年時只有15歲,是一個中學生。沙士來襲,家住淘大花園,難置身事外。「(沙士)爆得好勁,新聞都日日賣」,兆軒指當時全家足不出戶,但是哥哥貪玩出街,又未有戴口罩,結果開始發燒,一周後父母覺得「有啲嘢」,決定送他入院。

做搬運賺錢圓音樂夢

「阿爸孭住阿哥入院,送完返屋企仲(同我)一齊家居清潔」,當晚一起消毒,一起洗冷氣,想不到成為二人最後相處時刻。「第二日瞓醒已經見唔到佢(父親),佢知道自己有啲嘢,自己走咗入醫院」。哥哥入院時頭靠在爸爸肩膀,近距離接觸或令胡爸爸中招,哥哥病情日漸好轉,父親卻惡化快,由聯合醫院轉到威爾斯親王醫院,其間不能探病;「細佬呀,你方便就拎牙刷毛巾嚟啦……都係唔好,呢度好危險」,這是胡父致電回家與兆軒的最後一段對話,他很快陷入昏迷,3月底入院,5月離開了。「咁多年,我仲記得佢(爸爸)把聲,仲記得佢個樣」。
「頭3年,我同媽媽係唔識笑」。父突然離去,母子大受打擊,二人要接受心理治療,「媽媽嚴重啲,變化太大,日日都喊,佢講過,如果唔係你兩個,早就自殺」。家中經濟出現問題,在酒店做工程師的胡爸爸,一直是胡家唯一經濟支柱,「佢走咗,媽媽睇佢戶口,得兩位數字,50幾蚊」,曾經的嚴父,原來是世上最好爸爸,「佢將所有錢放晒喺我哋身上」。
沙士後胡家經歷了一段很窮的時間,他憶述,當時會步行個多小時上學,只為慳數元巴士錢,買麵做早餐;幸之後很多人伸出援手,校長知道家中情況,安排本身為風紀的他「看飯」,讓他能獲得免費飯盒。自小學習二胡,沙士後要繼續學琴很困難,「遇到好老師,唔捨得放開,但學費唔平」,結果「自己學費自己賺」,到觀塘工業區做「咕哩」搬運,時薪55元,「極度勤力練習,日拉夜拉,一方面都係情緒發洩」。
中七後兆軒考入香港演藝學院,先後修讀文憑、學位及碩士,主修二胡及高胡雙演奏,7年學費幸獲護幼教育基金資助。曾與著名小提琴家西崎崇子同台合奏,亦曾獲已故聲樂泰斗費明儀邀請,以獨奏者身份表演的他,現在是香港中樂團特約樂師,又是香港音樂事務處導師,去年更開設音樂中心。

相關新聞:疑似患者困隔離病房 面對死亡恐懼 「一個個推入ICU就見唔番」

盼回饋社會培訓人才

兆軒指,能成就其音樂事業,實在要感謝很多很多人,如護幼教育基金成員、著名兒科教授梁乃江醫生,他當年不時探望兆軒,關心他的生活與學業,「會定期約食飯,成日同我哋傾偈」;又例如張國榮紀念獎學金及匯豐銀行獎學金等,資助他在學期間到海外學習,令他有機會到北京等地跟隨國際級演奏家學習。
「沙士?我都唔知係人為定意外,但社會已經好好,有咁多有能力嘅人幫助(我哋)……當佢係意外,大家都唔想」。事情已發生15年,媽媽早已走出來,兆軒則指,現時主力想回饋社會,推廣中樂,培訓本地人才,「過去得到好多人幫助,想投放返喺社會上面」。
■記者嚴敏慧

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載