› 選擇地區
三藩市
紐約
洛杉磯
其他美國地區
香港 台灣 北美
 
2018年02月13日

隔牆有耳:
票選搶手貨 樣靚非無敵 
辦公室 男神靠膊頭 女神贏仙氣 - 李八方

聽日就係情人節,尚未有情人嘅打工族,點先可以搵到好姻緣?一項調查發現,最多人透過朋友介紹同參加興趣活動,增加有拖拍機會;而喺辦公室內,男神女神自然最搶手,但又咪以為被封男神或女神,一定係樣靚之人,同一調查發現,男神最緊要原來係膊頭,女神首要必備條件其實係仙氣。

戀情涉工作階級較避忌

基督教家庭服務中心嘅「盈力僱員服務顧問」去年11月至12月期間,以網上問卷成功訪問872個打工仔,77.4%受訪者認為工作環境對戀情發展有負面影響,而如果要喺辦公室發展戀情,79.4%受訪者傾向接受「同事」為對象,遠高於「上司」嘅46.1%及「下屬」嘅46.3%,可見打工仔喺戀情涉及工作階級時會有避忌。
若然打工仔真係同上司或下屬撻着,逾五成都話會以「地下情」方式處理,無非係一旦公開會惹嚟做事偏心、閒言閒語同情侶鬧交影響團隊等問題。
有關調查同時羅列咗16項特質,票選最高五項「辦公室男神」條件,排首位係「肯承擔」,其後依次係「做事細心」、「幽默」、「靚仔」同「有智慧」,男、女受訪者不約而同提出相似選項,可見除咗要聰明、靚仔同搞笑,有膊頭同做事「粗中帶幼」先係辦公室男神最重要嘅 DNA。
至於「辦公室女神」排名最高嘅五項條件則係「有氣質」、「靚女」、 「善解人意」、「做事細心」同「擅於溝通」。即係有樣又要性格好?女神果然唔易做!之不過呢個票選,男、女受訪者意見有差異,「靚女」一項喺女受訪者中排第三,男受訪者中就奪冠,「身材好」喺女性中排第十,但男受訪者排到第四,男人心目中嘅OL女神,明顯較多注重外觀。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載