› 選擇地區
三藩市
紐約
洛杉磯
其他美國地區
香港 台灣 北美
 
2018年02月06日

八方相當年:俾老師睇死
乳鴿馮文韜發憤學法文 - 李八方

識講外語總係煥發出精英感覺,而民主黨未來之星、25歲嘅馮文韜畢業於浸會大學歐洲研究系,主修法文,相信係香港政界中少數能講流利法文嘅人,原來佢經過一番寒窗苦讀,曾經俾老師睇唔起,先至燃起鬥志。
馮文韜原本唔係想讀浸大歐研,當年大學聯招第一志願係中大政治與行政,最終成績唔夠好入唔到,派咗第10志願浸大歐洲研究(法文)。讀得呢科要讀法文係必然,「第一年第一個學期,法文係8個學分,點知我攞D,成績好差,拉低整個GPA去到2分以下」。

幫過法國市長及陳太助選

系主任叫佢考慮轉系,但馮文韜向老師承諾下學期會畀心機讀。唔好以為老師聽到會好感動,當時老師一盆冷水照頭淋:「你點努力都係唔得㗎啦,你只會更差。」男人最討厭俾人睇唔起,馮文韜決定剃佢眼眉,搵私人補習、聽法文電台、不斷作文,結果法文由全班包尾爬升至全班第三、四,有次仲同睇死佢嘅老師喺堂上用法文爭辯。
馮文韜大學時去咗法國沉浸一年,參與咗當地嘅市長助選工程,幫手洗樓拉票,體驗選舉文化。呢次唔係佢首次助選,皆因佢讀緊中學時替陳方安生港島區立會補選助選,佢話嗰場選舉好緊要,絕對唔可以畀葉劉淑儀當選,「但因為當時年紀太細,只係可以幫手貼海報」。
馮文韜之後替劉慧卿、黃碧雲助選,2015年參選區議會落敗,2016年則參選立會九西排喺黃碧雲名單。點解入民主黨?佢話民主黨2010年支持政改方案,面對排山倒海嘅批評都堅持要做認為啱嘅事同對香港好嘅事,睇得出係個有承擔嘅政黨。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載