› 選擇地區
三藩市
紐約
洛杉磯
其他美國地區
香港 台灣 北美
 
2018年02月02日

隔牆有耳:
補選論壇力撐僭建冇問題 
娥姐由橋女郎變若驊buddy - 李八方

律政司長鄭若驊一上任就俾人踢爆僭建醜聞,搞到民怨沸騰,仲要遇啱有立法會補選,一眾建制派候選人就算平日點保皇都好,為求選票點都唔敢喺選舉論壇公開撐鄭若驊。不過都唔係個個咁縮骨,好似曾經高舉力撐689連任嘅陳玉娥,噚日喺選舉論壇力排眾議,力撐鄭若驊僭建冇問題,仲鬧民主派好拎住咁小事追殺鄭,將同場嘅民建聯鄧家彪完全比下去。

「係歷史遺留落嚟」

話說港台噚日舉行新界東補選論壇,其間一眾參選人被問到鄭若驊僭建醜聞時,個個候選人都出聲鬧,惟獨689忠心粉絲陳玉娥,佢不但冇鬧鄭若驊,仲狙擊民主派參選人范國威「攞住呢單好小嘅事」批評鄭,仲話僭建喺香港豪宅大部份都有,呢啲係歷史上遺留落嚟,娥姐其後更話自己支持鄭司長,自稱同娥特早前形容鄭若驊一樣,自己都試過因好多嘢做而「為公忘私」,強調佢都係呢種人,返到屋企亦唔會周圍望,叫大家唔應該因鄭若驊僭建大驚小怪喎。
比起娥姐赤裸裸瞓身挺鄭,身兼民建聯同工聯會兩個身份嘅鄧家彪,保皇力度就同娥姐差一大截,佢批評鄭若驊僭建係錯,仲話未來會叫鄭多啲上立法會,明明民建聯之前反對民主派對鄭若驊提出不信任動議喎!

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載