› 選擇地區
三藩市
紐約
洛杉磯
其他美國地區
香港 台灣 北美
 
2018年02月01日

隔牆有耳:食咗誠實豆沙包?
陳家珮:DQ主任睇黨章做嘢 - 李八方

選舉主任有咩做?以前大家可能唔多清楚,呢次選舉就知嘞,咪就係做一個「刀手」,幫中、西環篩走唔啱心水嘅候選人,好似港島區嘅選舉主任鄧如欣,冇畀香港眾志周庭任何回應機會,落閘DQ周庭喺港島補選嘅資格,勢估唔到,新民黨港島區參選人陳家珮咁坦白,噚日好似食咗誠實豆沙包咁喺港台嘅選舉論壇,就以「DQ主任」稱呼選舉主任,衝口而出嘅嘢,有時確係真心話。

稱區諾軒好處最大

港台噚日舉辦港島區補選論壇,就連噚日朝早仲未獲確認參選人資格嘅民主派區諾軒都獲邀。獲建制派群星拱照嘅陳家珮,當然就住自決、港獨問題進行狙擊,而席間談及DQ事件時,形容有關參選人(即係原競爭對手周庭啦)咎由自取,其間仲為選舉主任「獨立性」護航,仲好坦白咁流露心底話:「都係DQ主任(選舉主任)睇返黨章決定,絕對唔係阿爺話事,阿爺底線不嬲喺度,只不過你哋挑戰咁解。」
區諾軒就話補選入閘問題上,「西環都承認畀過意見」,「(律政司長)鄭若驊又話唔關佢事,到最後邊一個人能夠決定入閘與否?呢樣嘢體現西環、中環一家親」。陳家珮就回應話喎,「DQ其實對我冇好處,可能(對)區諾軒最大好處」。
港島區另一參選人任亮憲席間問過陳家珮有乜黨綱,佢回應話理性務實,總之就冇民族自決。同區另有伍迪希報名參選。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載