蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年01月15日

隔牆有耳:
奇女子聲援政壇李克勤 
齋舉牌造勢 收埋身份證拒投票 - 李八方

6,174
兩位基哥女fans拎住「支持政壇李克勤」同「支持基哥」大紙牌撐場。
張志華攝

世事真係無奇不有,噚日民主派初選嘅大日子,就已經有騎呢怪事發生!話說噚日九龍西唔少初選票站都排晒長龍,而八方中午去到石硤尾邨嘅票站時,就見到人頭湧湧,投票人士由街頭排到街尾。話晒石硤尾邨係民協何啟明嘅選區,算係民協地頭,民協馮檢基唔多唔少都有啲主場之利,排隊嘅選民仲好多都係基哥嘅fans㖭。
其中有兩個女fans就相當有心,排隊投票之餘不忘幫手拉票,拎住兩塊寫住「支持基哥」同「支持政壇李克勤」嘅大紙牌為基哥造勢,其中一位盧小姐仲話自己住喺九龍西,由馮檢基做區議員嗰陣,撐到𠵱家呀!之不過點解係政壇李克勤呢?唔通又想暗寸基哥係「政壇關愛座」?盧小姐入票站前尷尷尬尬、紅都面晒咁話:「我覺得係咪係囉!」

稱住西九 上屆投基哥

以為基哥呢兩票袋袋平安?咁你就錯喇。盧小姐投訴票站人員要抄佢身份證號碼,佢覺得係私隱冇畀到,票都唔投就出返嚟,如此睇嚟,佢對基哥嘅愛又唔夠多喎,點算係死忠粉絲?
盧小姐臨走前,八方決定考吓佢,問上屆有冇投畀基哥?佢竟然又話有。咦,基哥上屆轉戰選咗新西喎,無理由盧小姐為咗投票畀基哥,連屋都搬埋啩?到底係真.撐場抑或係搞亂檔卧底?八方當然無從稽考,只係覺得呢位奇女子好盞「鬼」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載