蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年01月11日
馬上成為壹會員

【Chill人生活】強國客來港掃貓山王
榴槤舖遲早多過藥房?

近月本港市面突然出現專售貓山王的零售店,顧客可即開即食,原來因內地未開放馬來西亞新鮮榴槤入口,惟「貓山王」榴槤卻已成為內地人至愛。有內地旅客坦承每次來港必搜尋新鮮貓山王的蹤影,有本港市民則恐貓山王價格被搶高。有榴槤店主直言已瞄準內地客市場,計劃在銅鑼灣尖沙咀等一線舖位開店,與金鋪、鐘錶店及藥房齊齊專做內地旅客生意。

記者 伍雅謙

由去年11月起,銅鑼灣及大圍均出現專售貓山王的零售店,標榜榴槤是新鮮空運抵港。店面沒有特別裝潢,只擺放榴槤及簡單桌椅,陳設一如臨時店舖,但可供顧客在店內大啖榴槤,有如馬來西亞當地的榴槤店舖。

位於鵝頸橋的榴槤店,毗鄰銅鑼灣時代廣場,附近亦有數間酒店,周六下午有不少顧客光顧。負責人黃小姐是馬來西亞華僑,原打算在貓山王旺季才開設臨時店,惟見反應良好,正考慮長租店面。她指除本地街坊,亦有不少遊客光顧,「見到就即刻食,想新鮮啲」,笑指內地客每人可吃掉兩個榴槤,亦會購買已開殼的榴槤肉取走,人均消費約千多元。開業約兩個月,已有深圳回頭客每隔半月便來光顧,正計劃在未來引入更多產品吸客。 

來自北京的遊客王小姐指,半個月前曾來港已吃過貓山王,「這裡的比大陸的好吃一點」,今次除趁留港數天盡吃外,更會購買部份帶返北京。廣州的安小姐就指香港的榴槤非常好吃,味道與廣州的不一樣,她與朋友兩人在店內大啖3盒共9件榴槤,「只要有時間都會嚟食」。

在大圍港鐵站附近,亦有一間開業約月餘的榴槤店。負責人葉先生坦言是先以大圍作試點,目前每日約可售出近200個榴槤,佔兩成為內地遊客,見反應甚佳,便瞄準內地遊客市場。他計劃短期內於銅鑼灣、尖沙咀及澳門開設新鮮榴槤店,希望將戰線打入鬧市一線舖位,預計屆時逾8成為內地遊客,「呢個係一個好大市場」。貓山王價格較浮動,而兩店大約售每磅110及120元。

雖然內地未開放馬來西亞新鮮榴槤入口,但葉亦有由大馬輸入急凍榴槤及榴槤蓉到內地,指近兩年銷量增長逾7成,「一個個貨櫃咁入去,賣得最好梗係上海、江淅一帶、北京,但連黑龍江都有」。他認為,隨著內地經濟起飛,內地人已吃得起貓山王,「消費比香港更犀利,中國遊客去馬來西亞,有邊一團冇去食榴槤,都係一車車咁車去果園食」,直言內地人在大馬已吃掉當地不少榴槤,「個啲都搶唔少啦,貓山王嘅產量就咁多」。

開創出榴槤放題的袁家駒指港人參有參加,但多只是「三三兩兩」購票,惟內地人「係一枱枱咁買」,今年底約30場放題,均有內地人參加,更有人大手掃走4箱共20個新鮮榴槤,「畀錢畀到港幣唔夠,問人民幣收唔收,佢點樣拎返去就唔知啦」。他曾聽聞有人用「自己方法」將大馬貓山王運到內地,亦有顧客問及可否送貨至上水或深圳交收。

貓山王售價年年遞增,袁指,1、2年前約200至300元已購得到品質不俗的貓山王,惟現時卻需400至500元,升幅達一倍。價格勁升,除因需求大增外,炒地亦令成本上升。他稱內地人不止到大馬及香港吃新鮮榴槤,亦到當地購買林地與果園,「大細(果園)都掃」,更炒起當地種植榴槤的林地價格,數年前一英畝榴槤林地,約售10多萬馬幣,現時則需50至60萬馬幣,升值5至6倍。

榴槤樹需要最少10年樹齡才能結出厚實果肉,袁坦言供應有限,「已經有人買緊出年果肉嘅原料嘅貨」,因供應量不足,直言亦正加緊物色新果園,「香港人都係炒緊馬來西亞嘅樓,但其實馬來西亞炒得最犀利嘅係榴槤地」。

根據統計處資料,本港由馬來西亞進口的榴槤,貨量及貨值均升,雖然現時逾9成榴槤仍由泰國進口,但數量已逐年下降。馬來西亞自2015年起,成為本港榴槤進口地區第二位,由以往每年進口不足30萬公斤,到2015年進口量為42萬公斤,2016年升至47萬公斤。去年大馬因大雨致榴槤失收,夏季產量減少,惟去年首11個月仍有近40萬公斤榴槤進口本港。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載