› 選擇地區
三藩市
紐約
洛杉磯
其他美國地區
香港 台灣 北美
 
2018年01月11日

隔牆有耳:咖喱范有紅Van
基哥有旅巴 預告贏初選? - 李八方

民主派就新界東同九龍西補選舉行嘅初選嚟緊個星期日就舉行,唔同候選人都各出奇謀爭取市民支持。有民主派中人大爆,九龍西候選人民協「老將」馮檢基似乎未卜先知,同黨友預告自己好大機會贏出初選,又話民協已經安排多架旅遊巴接載居民來回深水埗同石硤尾票站,預計至少會有1,000票。阿基雖然否認講過勝劵在握,只係話會盡做,但就承認有安排旅遊巴,至於總共幾多架就係秘密。

范二創《紅Van》海報

有民協中人透露,阿基近日已經積極喺深水埗同石硤尾多個屋邨洗樓,當正式選舉咁做。民協估計,阿基會喺電話民調「輸少少」,而實體投票就好大機會勝出。基哥就同八方講,自己冇講有勝算,只係會盡做,又話對手姚松炎都有新西票王朱凱廸幫手,不容忽視。講到有冇洗樓同租旅遊巴,基哥就承認有,但話係秘密無透露詳情,又話租車唔係為自己,「冇話支持馮檢基先上得」。
九龍西有基哥旅遊巴攻勢,新界東亦有新同盟范國威嘅紅Van助選。佢最近二次創作港產電影《那夜凌晨我坐上開往大埔的紅Van》嘅海報,更加將自己個頭P上林雪個身,話畀大家知佢凌晨都有街站。雖然P圖技巧有待改進,不過就創意滿分。候選人做咁多嘢都係想爭取市民支持,新界東另外兩個候選人工黨主席郭永健,同中大學生會前會長張秀賢都會積極落區,爭取出線。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載