› 選擇地區
三藩市
紐約
洛杉磯
其他美國地區
香港 台灣 北美
 
2018年01月05日

隔牆有耳:
DQ議員歸位開「人權大會」 - 李八方

噚日見番卿姐嘅張華峰,開心到攬住佢影相。

返嚟喇,全部都返嚟喇!唔止民主黨前主席劉慧卿,被DQ嘅社民連梁國雄、香港眾志羅冠聰同埋劉小麗,全部返番立會!噚日立法會政制事務委員會討論港府參照《公民權利和政治權利國際公約》提交嘅第4份報告大綱並舉行公聽會,卿姐、毛哥、阿聰、小麗等都趁機重返立會發言,唔少社運人士都有出席,例如工黨郭永健、眾志黃之鋒、雙學三子之一嘅周永康等。

廖長江叫「梁國雄議員」

噚日毛哥打頭陣發言,委員會主席廖長江叫毛哥發言時,就好順口咁講咗句「梁國雄議員」㖭!毛哥當然關注已故諾貝爾和平獎得主劉曉波同佢太太劉霞,不過廖長江唔畀毛哥帶印有劉曉波同劉霞肖像嘅紙入去開會,其後張紙仲畀保安沒收,激到毛哥即時喺場外開拖,好彩有工黨同事立即印過一張畀毛哥咋。
至於黃之鋒除咗關注DQ案,仲批評在囚人士無受到尊重,例如要踎喺地下答問題,連獨立投訴渠道都冇。而卿姐就主打法治問題,例如聯合國早喺2013年已經警告,由非司法組織嘅人大常委會釋法好有問題,會嚴重損害法治,家陣中晒喇,睇一地兩檢就知。八方心諗,如果佢哋全部都係議員,你話幾好呢。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載