› 選擇地區
三藩市
紐約
洛杉磯
其他美國地區
香港 台灣 北美
 
2017年11月30日

隔牆有耳:打流感針 田二少遇屏風壓頂
泛民怕「打敗仗」拒注射 - 李八方

流感高峯期將至,20幾位唔同黨派嘅議員噚日響應食物及衞生局局長陳肇始呼籲,喺立法會宴會廳接種季節性流感疫苗,泛民主派中只有人民力量陳志全出現,主席梁君彥都大讚佢係最勇敢嘅泛民,點知慢必大爆,其他民主派議員因為怕打完針有反應,唔可以繼續喺立法會內「打仗」,索性針都唔打,真係用心良苦。

梁君彥扮勇:未驚過

一眾議員齊集立法會宴會廳排隊俾護士打針,先拔頭籌嘅係主席梁君彥,梁自稱「驚都未驚過」,揚言一早叫定阿孫睇電視,而本身係護士嘅陳肇始就拒絕親手為議員打針,只係企喺後面招呼議員,幫大家摺起衫袖。當梁君彥同記者講嘢之際,原來護士已經打完疫苗,佢之後話一啲都唔痛。
自由黨邵家輝打針時就遮遮掩掩,原來佢因為恤衫太窄,難以摺起衫袖,被要求脫掉恤衫,其他議員見邵家輝露出胸膛,紛紛提醒佢「露還露唔好露點」,搞到邵家輝不知幾尷尬,打完針就急急腳逃離現場。
另一個罕有一脫嘅係實政圓桌田北辰,佢雖然露出短袖內衣,但就用恤衫遮住手臂,佢解釋係因為手毛多,所以要遮一遮喎!田二少仲一邊打針一邊向醫學界陳沛然爭取人大提名,陳醫生一口答應,真係打多幾針都抵呀。但打針期間有個小意外,屏風突然倒塌,好彩田二少等人冇事咋。
有議員勇敢一脫,但都有人守身如玉,好似民建聯葛珮帆就躲喺屏風後打針,神不知鬼不覺咁打完;新民黨容海恩就大方地坐定定打針畀傳媒任影。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載