› 選擇地區
三藩市
紐約
洛杉磯
其他美國地區
香港 台灣 北美
 
2017年11月23日

前員工:揸數緊損新聞部公信力

【本報訊】多名無綫新聞部前員工形容,「六嬸」方逸華生前接掌TVB的時期,正是該台由盛轉衰的轉捩點。曾在新聞部任職多年的呂秉權形容,六嬸旨在「揸靚盤數去賣盤」,把新聞部變為「賺錢部門」,犧牲了六四事件20周年等具重大新聞價值的海外採訪計劃,令新聞部公信力流失。
現任浸大新聞系高級講師的呂秉權在97至05年任職無綫新聞部,經歷了六叔淡出、六嬸接管的時代。港台《傳媒透視》記述,04年新聞及資訊總監羅燦及兩名主管同時離任,有傳因方逸華對新聞部有微言。呂秉權憶述,方上場後碰上經濟低迷,新聞部多次大地震、裁員、減薪,同事歡送羅燦時送他《舒特拉的名單》影碟,「意思係佢要救一堆人,最後犧牲自己,當事人冇否認冇承認」。

相關新聞:向太讚六嬸樂善好施甄珍聞好友死訊泣不成聲

六四20周年 大做變細做

呂形容方「揸數揸得太緊」,經典例子包括09年六四二十周年專輯,編採人員提出到美國等地尋訪六四見證者,「本來諗住大做,最後變咗細做,留喺香港(採訪)」。呂質疑:「胡錦濤外訪,全部係官樣文章,同中央台一樣,都係照去。反而記者自己想出差做啲嘢,都面對budget考慮」。他又不滿方把新聞部變為「賺錢部門」,積極為新聞節目尋找贊助,「得罪人、嚇走廣告商嘅嘢(新聞)唔會做」,「呢個台沒落,可以話佢任內發生,最終賣盤交畀黎瑞剛呢個中共黨員」。
方2010年起正式接任TVB行政主席。另一新聞部前員工透露,當時所有公幹開支須經方逸華親自審批,新聞部變相「放棄部份編採獨立」,「出trip可以少個人就少個人,做嘢空間咪細咗;去澳門唔准住,要即日來回。我哋記者夜晚10點返來,第二朝再過去都試過,咁你話對質素有冇影響?」
■記者白 琳

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載