› 選擇地區
三藩市
紐約
洛杉磯
其他美國地區
香港 台灣 北美
 
2017年11月19日

澳門逸園明年結業 600犬前路茫茫
退役賽狗溫馴易養 新主人:要為佢哋平反

【本報訊】如果去過澳門賽狗場看賽狗,或者你會被格力狗在賽道上狂奔的兇狠模樣嚇倒。「其實格力狗好純品,好乖,我要為佢哋平反!」領養格力狗Garlic的主人Edith說。Garlic屬極少數從澳門逸園領養出來的賽狗,前半生都在賽跑和訓練中度過,身上留下不能磨滅的傷疤。Edith的堅持令牠獲救,對於Garlic的過去,她說:「見到佢啲傷,根本連想都唔敢想像。」
澳門政府已決定不再與逸園賽狗場續約,賽狗會須於明年7月21日前遷離逸園,現時狗場內接近600隻格力犬去向未明,公眾欲領養格力犬也不易,Edith是極少數例子。今年3月,Edith從澳門市政狗房領養Garlic,至今相處逾半年。回想最初Garlic視她如陌生人,直至有一天終肯對她搖頭擺尾,至今仍難忘。

相關新聞:澳門愛協盼全球公開領養

「一日瞓10幾個鐘」

「嗰時Garlic要喺Anima(澳門愛協)住兩星期先可以返屋企,除咗返工真係日日去探佢,起初佢望一望你就趴番低,過咗7、8日之後佢見我起身擺尾,嗰刻真係好難忘。」Edith說。
帶Garlic回家時,試着為牠改名,「佢係狗女嚟,我哋叫咗好多個名,好似Eva、Sofia,佢都冇反應,是但叫Garlic,因為好似格力狗個音,點知佢笑喎,其實個名係佢自己揀」。她認為,格力狗與蒜頭同樣愛者趨之若鶩,惡者避之則吉。
Edith形容Garlic膽子小,比較文靜,「心情好嗰陣咪跟住啲人行嚟行去」,又指牠平日很懶,最多時間是睡覺,「佢一日可以瞓10幾個鐘以上都得,醒嘅時間得食嘢同散步」,笑言自己與格力狗性格一樣喜歡睡覺。她說打理格力狗其實很容易,基本上只要有一張梳化或一個軟墊已經可以,因為牠們長期「攤喺度」,且不會吠、性格溫和及容易親近。
記者與Garlic見面兩次,一次在澳門愛協,另一次在Edith家。首次見面時,愛協裏另有兩隻格力狗,Garlic只是默默地站在主人旁,然後好像旁觀者般看着另外兩隻格力狗玩耍。第二次見面相約在Edith家,開門之時,Garlic笑臉擺尾迎接,Edith接着說:「Garlic好似認得你哋喎」,不一會Garlic回到牠的軟墊攤唞着,如是者一個下午,直至晚飯才施施然走到廚房等吃。

成績不佳遭「賣豬仔」

今年5歲的Garlic,相等於人類45歲,體形較同類中細小,其毛色呈斑紋,身上仍留下以前賽狗受傷的傷痕。Edith指,Garlic在3年前於澳洲跑過六場賽事,因成績不佳在2015年被「賣豬仔」到澳門逸園賽狗場,名為「雄中寶」,輾轉遷移到市政狗房。被問到Garlic以前的生活,她不想知道亦不敢想像,希望藉自己和Garlic解開世人對格力狗的誤解,「其實佢哋真係好純、好乖」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載