› 選擇地區
三藩市
紐約
洛杉磯
其他美國地區
香港 台灣 北美
 
2017年11月10日

隔牆有耳:三成人睇星座擇偶
處女座脫獨高危 - 李八方

聽日又到11.11光棍節,呢個安慰單身狗嘅笑話其實好可悲,做A0真係好sad。有交友配對公司以問卷調查訪問520名、主要係40歲以下嘅單身男女,發現單身原因不外乎擇偶條件苛刻,更有趣發現迷信並非港女專利,男女皆分別約有三成人會以星座及同生肖作為擇偶條件,原來最多人抗拒選擇處女座男女做另一半,因為覺得佢哋完美主義、麻麻煩煩。
交友配對公司HK Romance Dating Limited兩位創辦人就係前新聞主播張惠萍同黃嘉如,佢哋話曾經接過一個有趣個案,一名36歲任職測量師嘅男士,擇偶條件竟然係唔可以屬虎,原因係媽媽話阿仔同屬虎嘅女仔命格相沖,而佢喺過去拍拖經驗又咁啱發現屬虎嘅女仔唔適合自己,所以認同媽媽嘅說法,定下擇偶條件為女士不能屬虎。媽媽嘅說話原來會製造不少單身狗。又有一名29歲任職核數師嘅女士因媽媽叫佢要門當戶對,要選擇醫生或律師做伴侶,結果佢單身近7年。

空姐成日飛 男士卻步

兩位創辦人話畀八方聽,工作情況會影響「脫獨」,不少男女皆不期望另一半需通宵工作,即使空姐樣靚身材正,但因為空姐成日飛,令人冇安全感而導致男士卻步;亦有女士忙到不分晝夜地工作,甚至3日未曾見過同住父母,即使有男士不停傳訊息追佢,佢因忙碌而已讀不回,結果長期單身。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載