蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年11月09日
馬上成為壹會員

iPhoneX螢幕故障
果迷:個screen好似閃電咁

【本報訊】果迷期待的蘋果新一代iPhone X手機於上周五(3日)首日發售,隨即有用家出現壞機情況。讀者陳小姐自周日起使用其iPhone X,但一天後即發現螢幕疑故障不停閃動,「最惡劣時斷秒計係咁閃,好似閃電咁,打字打唔到,睇又睇到頭暈!」她已把壞機拿回蘋果店,但因缺貨需等兩周才可換機,直言對蘋果產品略感失望。

任職會計的陳小姐稱,上周五iPhone X首發當日,她一早約8時到電訊網絡商店外排隊購買新機。當新機到手後,她先將舊有iphone 7 plus的資料備份,還特意為新iPhone X「裝身」,「買晒所有嘢,配件全部搞掂晒」;到周日才第一日使用iPhone X,詎料周一早上即發現故障,螢幕不停閃動。

「周一朝早開始(iPhone X)個螢幕間竭喺度閃,初時可能係幾分鐘,或者幾個字(數十分鐘)先閃一陣間,但到下晝就不停咁閃,閃到用唔到,係打唔到字嗰隻!」她於是把手機拿到ifc的蘋果專門店檢查,「職員睇完話冇得救,要換機,但冇機要等2星期」。她最終由職員開出單據,打算稍後憑單據到店換機。

陳小姐不忿說:「最唔抵係第一批攞機,第一個鐘頭攞機,諗住自用唔炒啦,但點知用兩用就冇得用!」她續稱:「本身第一日好開心,所以幫佢(iPhone X)裝晒身諗住長用,好彩部7 plus冇掉到。」

原來陳小姐自iphone 4開始已用蘋果手機產品,是忠實果迷,過去亦從未發生類似事件。不過,她不諱言經過今次,對蘋果品牌稍稍失去信心,「成一萬蚊部iPhone X,又話機王,冇諗過用一日就壞......講得呢部機咁好、咁特別,冇諗過會一出就壞,唔值咁多錢囉!」

蘋果公司發言人回應《蘋果》稱,將會跟進有關事件,希望接觸到有關顧客,收機檢查後,以確定程式上出現何種問題,並盡快安排換機。發言人指迄今並無收過同類型投訴,相信陳小姐的個案屬個別例子。

電機暨電子工程師學會香港分會主席張星煒表示則指根據影片估計,投訴的iPhone X螢幕出現閃動,主因可能是控制螢幕的晶片出現問題,因為若軟件出現問題,理應可馬上更新解決。他解釋,晶片的設計複雜,當中涉及很多電子零件及線路,若當中某部份出現故障,令訊號無法順暢傳送到螢幕,使會出現如影片中的閃動問題。

張星煒指無可能全部生產的手機都表現良好,一般的品質驗證過程中,只會抽取部份手機檢驗,以推算該批次出現壞機的機會率。事件中,陳小姐的手機需等待2星期才能換機,張星煒認為蘋果應按壞機機會率,預留部分額外手機供客戶作更換之用,現時要買家等待2星期的做法理應可以避免(應可縮短等候時間),若不作改善,難免令買家失望。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載