› 選擇地區
三藩市
紐約
洛杉磯
其他美國地區
香港 台灣 北美
 
2017年11月03日

隔牆有耳:為孫中山完成十萬英里未竟之志?
工聯會醬爆哥「我有一個高鐵夢」 - 李八方

設計圖片

被網民封為工聯會醬爆哥嘅立法會議員陸頌雄,噚日趁住立法會辯論一地兩檢無約束力議案時,肉麻hardsell高鐵,佢先感謝政府提出今次議案,認為反映政府重視行政立法關係,繼而就插民主派,話政府嘅良好意願卻「熱臉貼着冷屁股」,批評民主派係「欲拉之布,何患無辭」,成功以soundbite搶鏡。
其後佢又自爆「我有一個夢,一個高鐵夢」,話細個返鄉下係坐「硬座、冇冷氣嘅綠皮車」,過程好唔舒服,知道外國有新鐵路時都好羨慕,所以好支持國家發展高鐵,仲強調呢個唔係佢一個人嘅夢,揚言早喺100年前,孫中山喺《建國方略》已經提出,目標係建設十萬英里鐵路網。

泰博:你支持三民主義?

嘩,嗰份紅色愛國醬爆味,真係隔住個mon都聞到。熱血公民鄭松泰聽完呢番毛管戙言論後就主動補充,話孫中山當年想興建鐵路係事實,但孫中山同時一生致力推翻專制統治,致力建立國民政府,諷指:「唔通係咁你又支持三民主義咩?」
查實俾人叫做醬爆哥,嬲唔嬲㗎呢?似乎陸頌雄都幾enjoy,佢向傳媒指,自己係周星馳嘅fans,所以唔介意有呢個星爺電影中嘅角色封號,唔排除扮醬爆拍片宣傳㖭!

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載