› 選擇地區
三藩市
紐約
洛杉磯
其他美國地區
香港 台灣 北美
 
2017年10月25日

隔牆有耳:公和搞掂牌照 太子女爆喊送抱
民望高堂堂正正食豆腐 - 李八方

民望高噚日狂擦豆品,隊完豆漿再啪碗豆腐花。

有57年歷史嘅深水埗公和荳品廠,因牌照問題近年屢被食環署檢控,6月起休業裝修後,噚日舉行開幕禮,主禮嘉賓之一嘅前局長民望高高永文一到場,公和第五代傳人「霞女」蘇意霞激動爆喊,仲即時上前攬攬,究竟發生乜事?
霞女話翻新公和共用咗150萬,遇到唔少困難,好彩年初遇見高醫生,高醫生鼓勵佢唔好放棄,要堅持咁有特色嘅傳統豆品業,佢至決心做到𠵱家,「高醫生唔只識醫人,佢仲醫番好呢間舖頭、醫番好呢個行業」。

嘆做官時唔方便幫襯

自爆細個時已經係「豆腐狂」,豆腐當正餐食嘅高醫生一到公和,隊完豆漿再啪碗豆腐花,之後狂食煎釀豆腐,有人想訪問佢,佢都話:「唔得閒啊,食埋先啦!」仲攞埋兩樽辣椒腐乳轉身走。
高醫生其後解釋,過去因為喺醫管局同政府工作,冇乜機會食佢至愛嘅豆腐,因為公和牌照有問題,嘆早排唔係好方便幫襯公和,「我喺政府做嗰陣係好小心,去邊度食嘢前,要先check個地方係咪攞正牌先,咁你話我平時點可以走嚟食呢?」佢話好開心以後可以堂堂正正、唔使偷偷摸摸咁去公和食豆腐,話巿民日後可能會喺深水埗撞到佢「搵食」。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載