› 選擇地區
三藩市
紐約
洛杉磯
其他美國地區
香港 台灣 北美
 
2017年10月20日

隔牆有耳:恩恩豬同容總「深度交流」
被讚「真係好靚女 議員中最靚女」 - 李八方

容樂其同容海恩日前撐枱腳,睇相都覺得二人好歡樂。

早已名花有主嘅新民黨立法會議員「恩恩豬」容海恩,前晚同一男子撐枱腳,親密合照仲被放埋上facebook,究竟所為何事?原來早排恩恩豬因為一場網上小風波,同輔仁媒體總編輯容樂其熟咗,容樂其之後仲撰文大讚恩恩豬深明拉關係嘅重要,舉例指早前有網民笑佢多雀斑,佢就問番網民「介紹啲嘢搽面」;當網民笑佢只係識派月餅畀阿婆,恩恩豬就親手整足20個派畀網友,獲得容樂其激讚。

德文談心

而呢場「雙容會」,前晚喺立法會拉布後進行,容樂其同容海恩撐枱腳後喺fb形容呢餐飯同對方「坦誠深度交流咗成晚,真係好歡樂」,仲話自己已經好耐冇講咁多嘢畀人聽喇,大讚恩恩豬「真係好靚女~肯定係全部議員之中最靚女!」又自爆席間講咗好多秘密,似乎好鬼冧。
八方問過恩恩豬,佢話最近花多咗時間上網接觸巿民,由於容樂其經常喺網上出post介紹香港美食,兩人傾傾吓就約咗呢餐飯。對於容樂其讚佢靚女,恩恩豬即時笑開顏,並指席間所指嘅「秘密」,其實係容樂其分享咗一啲個人歷史,包括以前曾經加入社民連,自言:「我之前唔知(佢入過社民連)㗎,我係睇《文匯報》先知㗎。」恩恩豬仲話餐飯最大驚喜,係發現大家大學時都曾修讀德文,席間佢示範講咗幾句後,容樂其都讚佢「講得幾準、幾正喎!」佢又話同容樂其同姓,都係席間一個話題,實則容樂其鄉下喺番禺,容海恩則係新會人,所以兩人應該冇乜親戚關係,只係咁啱大家都姓容喎。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載