› 選擇地區
三藩市
紐約
洛杉磯
其他美國地區
香港 台灣 北美
 
2017年10月18日

八方人物:小背心李彩華 放低魚蝦蟹吹色士風

「是但啦,算數啦,平埋佢嘞,送埋兩隻蝦。」由網民二次創作口水歌《你唔買我啦》,最近在網絡大熱。因與女藝人「撞名」屢被惡搞,慣接受傳媒訪問評論海鮮價的海鮮業聯合總會主席李彩華笑說玩得開心。麻甩魚佬真人不露相,大半年前還自組中坑管樂團「耆樂無窮」,尋找賣魚外的第二人生。
「叫得海鮮價,即係日日唔同,天氣同來貨量都有影響」。每日凌晨4時天未光,華哥已下床準備開工。華哥主力做鮮蝦,每日批發量達3噸,即近一萬斤,全港酒樓食肆的海蝦基圍蝦,幾近由華哥代理。這個活蝦大王,最近卻被網友惡搞抽水,將同名女藝人的舊曲譜上新詞,還剪接成MV,向來玩得的他毫不生氣,更欣賞網民創意。
「我有睇過,幾搞笑,仲影埋我去赤柱表演……嗰個吹緊色士風嘅肥佬真係我嚟,如假包換!」自學吹色士風4年,認真到組成22人管樂團四出表演。練習日馬不停蹄,正午12時收工回家小休一會,晚上又去夾歌。「吹得好華哥請食斑,吹得唔好就食泥鯭」,百呎band房塞滿人,麻甩佬們七嘴八舌,偶爾響起喇叭牌正露丸經典音樂,引來哄堂大笑。「最初喺屋企練,有個師奶同我老婆呻:唔知邊個衰人夜晚吹色士風嘈到死,我老婆答佢:個衰人咪係我老公囉!」華哥大笑。愛音樂卻無機會學音樂,身為長子有3個弟妹,11歲即輟學賣海產,由住家艇做到龍頭,59歲的華哥一做半世紀。

相關新聞:八方人物:「李彩華小背心」成網民中伏代名詞

小時聽收音機自學口琴

小時住在艇上,華哥直言55歲前只自學過最便宜的口琴。「外公外婆架船泊隔籬,一日到黑播粵曲。每日中午,梁日超(著名口琴家)就喺收音機教吹口琴」。但他的音樂路小六就終止。「老竇爛賭,魚檔只有阿媽一個做,我唔幫手仲有邊個吖?」
「唔好話音樂,口琴都放低咗廿幾年,因為參加社區活動籌款先玩番」。全情投入玩色士風,華哥自言有段古,重遇小學同學黃德成,由小學參加樂團的快樂,說到結婚生仔,人生走了大半還有甚麼想做但未做?「佢叫我不如一齊去學吹色士風,我話邊有時間吖。」老友學完,回來教他,華哥問表妹夫借來平價色士風,一玩重燃心中火。「黃德成有班音樂朋友,有次話不如約入嚟香港仔食海鮮」,幾杯落肚,興之所至一齊夾歌,由《蝦妹共你》到《舊歡如夢》,樂團「耆樂無窮」由是誕生。
■記者呂麗嬋

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載