› 選擇地區
三藩市
紐約
洛杉磯
其他美國地區
香港 台灣 北美
 
2017年10月09日

隔牆有耳:阻送院兼串錯「Rax」 
纏星如集郵 葛博士勁吸嬲 - 李八方

神奇小子曹星如星期六晚同前日本拳王河野公平對決,睇到台下唔少政商界名人好肉緊,最終打到眼都腫,險勝續保不敗紀錄,自然令港人興奮莫名,有份入場嘅民建聯立法會議員葛珮帆(EQ)甚至喺賽後同對方合照,仲引述對方話「左眼好痛好痛但堅持打落去」,點知抽水抽着火水,網民鬧佢阻延星如求醫,狂畀嬲嬲豬。
呢場賽事曹星如陷苦戰,初段已經受傷,最終以點數獲勝後送院驗傷。大家睇到佢額頭腫過隻蛋,梗係接受治療最重要,點知到場捧場期間喺facebook做直播嘅EQ,好唔識趣,賽後仲到後台同對方合照,又引述對方話,「左眼好痛好痛但堅持打落去,結果醫生認為不能再繼續比賽,提早結束為止。香港精神永不放棄!!星如現在會去醫院診治」。

「呃like可以去到幾盡」

相片可見星如好禮貌地保持微笑,而EQ最初將對方嘅英文名Rex串錯Rax,畀網民揶揄後立即更正,但網民嘅怒火未有因此被冚熄,好多人留言抨擊佢阻住星如求醫,諷指:「為咗呃like可以去到幾盡?」、「一個正常人不會在這時候去同曹星如影相」以及「將快樂建築喺人哋痛苦身上」,EQ呢鋪明顯抽水抽着火水。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載